SHILLONG: Gambegre Assembly constituency-ni by-election-na National People’s Party (NPP)-ni candidate-ko parakna skang national committee-ni ra·chakaniko sengengkua.
NPP-ni national president aro a·dokni Chief Minister Conrad K Sangma-ni parakatani gitade, NPP state committee-ni recommend ka·atgipa candidate-ni bidingo chanchina gita da·o dipet national committee tom·kujaenga.
“NPP state committee-ni recommend ka·atgipa candidate-ni bimingkode chinga man·soaha indiba iani bidingo chanchina gita national committee tom·kujaenga. State committee-ni watatgipa candidate-ni bimingko national committee ra·chakahaon, Gambegre by-election-na NPP-ni candidate-ko parakatgnok,” ine ua aganaha.
State committee-ni recommend ka·atgipa candidate-ni bimingko sing·on, ua bimingko da·o dipet aganna man·kujawa ine Sangma aganskaaha.
NPP-oni mitam koborko on·ani gitade, Gambegre by-election-na NPP-ni state committee, gimik sakchet candidate-rangoniko baseenba, Chief Minister Conrad K Sangma-ni jikgipa Mehtab Chandee A Sangma-ko national committee-na recommend ka·ataha.
Gambegre by-election-o NPP-ni tikitchi susana gimik sakchet candidate-rang dongachim indiba ja·mano sakbride ong·katpilahani gimin sakbri candidate-rangoniko baseenba Chief Minister-ni jikgipa Mehtab Chandee-ko state committee recommend ka·ataha ine kobor on·timgiparang u·iataha.
Re·anggipa April jao ong·atanggipa Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·ahachim aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko jadokni gisepon seoktaina nangengachim.