TURA: Garo Hills-ni a·kawe jolrango chi banenggipa biaprangko Sukrobar salo, Tura-ni MP Saleng A Sangma nina re·angaha aro jolo songdongenggipa manderangni neng·nikanirangkoba knatime ra·baaha.
Chi banenggipa biaprangko nieanio Tura-ni MP baksa Congress dolni dilgiparang, chong·motan Brigady Marak, Ferlin CA Sangma, SG Esmatur Mominin aro gipin dilgiparangba dongpaaha.
Chi banenggipa biaprangko nieanio Tura-ni MP, bilsiantian iandake chi bananirangchi manderang dukrangko chakna nangtokengoba maming pangkamgipa ja·kurangko de·jaengani gimin NPP-chi dilenggipa a·dok sorkariko matnangataha.
“Bilsiantian chirang banenga aro bilsiantian minister-rang ia biaprangko re·bae niangenga. Chi banenggipa gipin biaprangnade ma·mong sorkari gong kror 8000-ko on·aha indiba an·chingnade pelsakoba on·jaha. Bilsiantian a·dok sorkari proposal-rangko on·a dongjani a·selan tangka paisarang sokbajaenga. Chi banenggipa biaprangna sorkari maiko on·na miksongenga, kg 2 merongko? Indita bilsirangna maming ja·kurangko de·chipjaha. Indiba ia chango na·simang chingko seokahani gimin chinga chingni bil ama gita jekoba dakna jotton ka·gen.,” ine Saleng aganaha.
Manderangni neng·nikanirangko komiatna gita ua ma·mongni dingtang dingtang department-rang baksa kamko ka·gen ineba Tura-ni MP ku·rachakaniko on·angaha.
“Chi banenggipani bidingo Phulbari-ni gitcham MLA Mominin angna aganaha aro angko ia biaprangona re·bae nichina aganaha. Batanggimin somoirango anga kamrang jakchakjae ia biaprangko niena man·jaha indiba anga da·o an·tangko choljokate ia biaprangko nina re·baaha. Ia biaprangko anga niena skang, chi bananirango Meghalaya a·dokna mai dakchakanirangko on·enga, uarangko anga Delhi-ni dingtang dingtang department-rangoniko am·sandiaha indiba chi banenggipa biaprango pangkamgipa dakchakanirangko on·na gita maming proposal-rangan dongja ine anga nikna man·aha,” ine Saleng aganaha.
Saleng-ni aganani gitade, re·anggipa bilsio ma·mong sorkari, chi bangipa dingtang dingtang a·dokrangna gong kror 8000-ko chame on·aha aro ianoni Assam-na kror 100 aro Arunachal Pradesh a·dokna gong kror 23-ko chamatahachim indiba Meghalaya a·doknade pelsakoba chamata dongskajaha.
“Chi bananirangkode an·ching champengna man·jawa indiba chi bananichi nangchakeanirangkode komiatna gita an·ching kamko ka·na man·chongmotgen. Uni giminsa angni ia biaprangona re·bae nieanio, cholrangko nina gita anga dingtang dingtang department-rangkoba rimbaaha,” ine Tura MP aganaha.
