SHILLONG: Meghalaya a·dokni State Reservation Policy-ko nipiltaianio, Khasi, Jaintia aro Garorangna chamgimin 80 percent-o Khasi aro Jaintia Hills a·jarango songdongkamgipa A·chikrangnaba a·ja damgnini District Selection Committee (DSC)-o cholrangko on·china Rengdim-o donggipa United A·chik Youth Federation (UAYF) aro All Khasi Hills Nokma Welfare Association (AKHNWA) Rengdim regional unit, Reservation Policy-ko nipiltaina sorkarini songe on·gipa Expert Committee-ko didiataha.
Ia dolgni NGO-rangni Expert Committee-na sedoatani gitade, British sorkarini somoionin, Khasi aro Jaintia Hills a·jarango songdongkamgipa A·chikrang lakgnimangni gita donga indiba ia a·ja damgnio songdongenggipa A·chikrangde, District Selection Committee (DSC)-ni gita kamna ra·anio cholrangko man·parongjaenga.
Khasi aro Jaintia Hills a·jao songdongenggipa chadamberang chu·onga gita poraiani gadang dongpagiparang ong·genchimoba Garo Hills-oba kamrangko man·na neng·ani ong·a aro apsan daken Khasi aro Jaintia Hills a·jani DSC-oba ia a·ja damgnio songdongpagipa A·chikrangde nichanggalako man·ronga ine UAYF-ni general secretary Zimichryst Marak parakatenba, State Reservation Policy-ko nipiltaianio Khasi aro Jaintia Hills a·jarango songdongenggipa A·chikrangnaba DSC-o cholrangko on·china didiataha.
1972 bilsini Reservation Policy-o pangchake Khasi-Jaintiarangna 40 percent aro Garorangna 40 percent-kon ja·rikangkuchina Expert Committee-ko didiatskaengon, Khasi-Jaintia-rangna chamgipa 40 percent-oni 20 percent-ko songadam nokadamni candidate-rangna aro 20 percent-ko jillarango donggipa candidate-rangna chamenba, apsan daken Garorangna 40 percent chamaoniko 20 percent-kode songadam nokadamrango donggipa manderangna aro 20 percent-ko jillarango donggipa manderangna chamskachina UAYF aro AKHNWA, Expert committee-ko didiataha.
