TURA: Meghalaya a·doko Directorate of Health Services (MI)-ni Joint Directorate Committee-ni ning·o Consultant-ni kamna interview ra·anio 1972 bilsini State Reservation Policy-ko ja·rikja ine Garo Hills-ni dingtang dingtang NGO-rang, chong·motan Ku·mande Rikrim Kotok (KRK), New Tura Development Forum (NTDF), Garo Graduates Union (GGU), Garo Hills Environment Protection Society (GHEDPS), Tura Garo Senior Citizens Forum(TGSCF) aro uandakgipa dingtang dingtang dolrang suk ong·gijaniko parakattokaha.
Ia NGO-rangni parakatani gitade, Directorate of Health Services (MI)-ni Joint Directorate Committee-ni ning·o Consultant-ni kamna interview ra·anio sak 15 candidate-rangko seokahachim indiba interview-ni result-ko parakanio A·chik candidate-rangonide saksaba biming dongskajaha.
“Consultant-ni kamna interview ra·anio sak 15 candidate-rangko seokaha indiba A·chik candidate-rangonide saksaba biming nakatjaha. Indide ian State Reservation Policy 1972-ko pe·a ong·jaengama?” ine NGO-rangni pal, TGSCF-ni general secretary LC Momin sing·doataha.
Consultant-ni kamna interview-ni result-rangko parakanio maio pangchake candidate-rangko seokaha ukoba talataniko on·jaha ine janapatengon, ia kamna candidate-ko seokanio A·chik candidate-rangoni saksaba biming donggijaniara State Reservation Policy-ko pe·ani gita ong·chongmotaha ine A·chik NGO-rang parakataha.
Indake ong·engon, ia kamna interview ra·ani result-rangko den·galpilchina aro Reservation Policy-o pangchake candidate-rangko seokchina gitaba A·chik NGO-rang, Directorate of Health Services (MI)-o dabiangaha.
