SHILLONG: Hynniewtrep National Liberation (HNLC) bobil dolni membor sakgniko Ri Bhoi a·jani police-rang rim·na man·aha aro ia manderango sing·sandion, uamang Bangladesh a·songo training-ko ra·aha ine ku·rachakaha.
Adita salrangna skang police-rangni rim·gipa HNLC-ni membor sakbri, chong·motan Cyfrank Paul Pariat, Kitbok Mujai, Barnabas Lyngdoh, aro Wanpynshngai Dympep-ko sing·sandiani ja·man police-rang HNLC-ni membor sakgniko rim·na man·aha.
Ri Bhoi a·jani Superintendent of Police (SP) Jagpal Singh Dhanoa-ni aganani gitade, rim·ako man·gipa mande sakbrioni saksa Cyfrank Paul Pariat-de, East Khasi Hills a·jao donggipa Umlyngka songni bilsi 32 ong·gipa Kynsaijun Thabah baksa 2023 bilsini July jaoni 2023 bilsini August jaona Bangladesh a·songo training ra·aha ine ku·rachakaha.
Ia mandeni ku·rachakani ja·man, Kynsaijun Thabah-koba police-rang, July 5 tariko rim·na man·aha aro uaba HNLC bobil dolni ning·o Cyfrank Pariat baksa Bangladesh-o training-ko apsan ra·aha ine ku·rachakaha.
Thabah-ni ku·rachakani ja·man police-rang, Bristibar attamchibara Mawlai Umjajiew-ni bilsi 38 ong·gipa Sanborlang Rapsang-koba rim·na man·aha. Rim·ako man·gipa Rapsang-ara Hynniewtrep National Youth Front (HNYF) Mawlai circle-ni president-ba ong·achim ine SP parakataha.
