TURA: Ru·uta bilsirangonin matchotchipgija dongenggipa Rongai Valley Medium Irrigation Project-ko matchotate on·china West Garo Hills a·jani Chibinang jolrango songdongenggipa manderang, Tura-ni gital MP Saleng A Sangma-ko didiataha.
Iani bidingo Tura-ni MP-na seachi u·iatengon, ia dam-ko rikna gita krorni kror tangkarangko koros ka·engoba da·onan ia project-ko matchotchipkujaengani a·sel Chibinang jolrango game ge·e cha·enggipa manderang, maming cholrangko man·tokjaenga ine jolo songdongenggipa manderang parakataha.
Ia Rongai Irrigation project-ko matchotchipkujaengani a·selan paktangtangchi a·arang ruronge, chirang apalbatatako man·aha aro a·a nokgiparangsa neng·nikanirangko aro noksan ong·na nangtokenga ineba jolo songdongenggipa manderang, Tura-ni MP-na sedoatgipa chittio parakataha.
Ia dam-ko matchotchipgija donengani a·sel ian jolo songdongenggipa manderangna namgni ong·ani pal neng·nikanirangkosa ra·baskaenga ine janapatengon, ia dam-ko ta·raken matchotatchina ong·jaode ia damko pe·e galsrangchina jolo songdongenggipa manderang, Tura MP-ko didiataha.
A·arangni ruronganiko champengna gita chiringni paktangtangon pakmarangko tarichina gitaba Chibinang jolo songdongenggipa manderang dabiangaha.
Ia Rongai Valley irrigation project-na 1990 bilsio New Delhi-ni Planning Commission, gong lak 1,630 tangkarangko chame on·ahachim.
Ia project-ni barrage ba dam-kode rikanirang matchotahachim indiba ja·mano contractor-rangna tangka gamani aro a·a ra·ani bidingo neng·nikanirang ong·katahaon ia project-ko matchotgija galchipaiahachim.
Indake ong·genchimoba 2018 bilsio Meghalaya sorkari, ia project-ko a·bachengatpiltaina miksonge, ia biapko re·ange nieahachim.
Garo Hills-ni a·kawe jolrango ia project-an dal·batsranggipa project ong·engani gimin ia scheme-ko sorkari, multipurpose project dake ra·gatskana miksongenga ine ua somoio a·dokni Deputy Chief Minister Prestone Tynsong parakatahachim.
 |
ReplyForward
|
