SHILLONG: Meghalaya a·doko Inner Line Permit (ILP) aro Meghalaya Resident Safety & Security Act (MRSSA)-ko ra·gat-kujaengani gimin dingtang dingtang dolrang, niamko jaktango ra·e, a·dokona re·bae kam ka·e cha·eng-giparangko aro re·ruraeng-gipa manderangni kosako sinjetanirangko on·engani gimin MRSSA Amendment Bill-ko ra·chakchina gita Nongpoh constituency-ni UDP MLA Mayralborn Syiem, a·dokni Governor-ko didiataha.
Ia MRSSA-ara gipin biaprangoni re·bagipa man-derangko nirok sandina aro gipin biaprangoni re·bae kam ka·e cha·enggipa man-derangko nirikkina dongi-min niam ong·achim indiba ia MRSSA-ni amendment bill 2020 bilsionin bangki dongkuengachim ine nikna man·a. MRSSA-ko 2016 bilsion pass ka·ahachim indiba iani Amendment Bill-de Governor-ni ra·chak-aniko nangkuengachim.
Indake ong·engon, a·doko ILP-ko ra·gate on·chipkujaengani a·sel a·doko songdongenggipa manderang aro dingtang dingtang dolrang, sorkarini kosako jegalanirangko dak-tokengahani gimin MRSSA-ni amendment bill-ko ra·chakchina gita Nongpoh MLA, a·dokni Governor-ko didiatskaaha.
ILP aro MRSSA-ko ra·gatkujaengani giminan NGO-rang, ILP checkgate-rangko songe, labour licence-rangko sandirok-skaenga ine janapatengon, a·doko ILP dongkujani gimin gipin biaprangoni re·baenggipa manderangko nirokna gita MRSSA-ko nangchongmotenga ine Syiem parakataha.
A·doko ong·enggipa obostarangko nirokenba, MRSSA-ni amendment bill-ko ra·gatna gita ta·rake ja·kurangko de·chinaba ua a·dokni Governor aro sorkariko didiataha.
