A·doko nurse-rangni post-rangko gapatjaenganina TMC suk ong·gijaniko paraka

TURA: A·doko sana banani a·bao dangdike on·enggipa nurse-rang chu·ongjaengoba bang·e dongenggipa nurse-rangni bangbanggipa post-rango gapatgija donengani gimin Garo Hills-ni TMC sing·doaniko dakaha.
“Meghalaya-ni nurse-rang a·song gipinrangchi kamrangko man·pilengani gimin kusi ong·chake aganengon, an·chingni healthcare system-na suk ong·gijanikoba uamang parakaha. An·chingni a·dokoni, a·palchi kam ka·enggipa bang·a nurse-rangan a·palona re·bana ske dongtokenga, aro bangbang dongenggipa post-rango cholrangko am·tokenga. Ian ra·chakna man·gija aro MDA sorkarina kratcha·ani ong·a. Sorkari, a·doktango sana bananiko namdapatna ja·ku de·aniko nikchanggalpile, a·palchi kam ka·na re·anganiosa chakpaaniko on·pila” ine TMC Youth dilgipa, Richard Marak aganaha.
Nambata sana-bananirangko on·na man·na gita dangdike on·enggipa nusre-rangna permanent kamo rakkiani pal, temporaray ba contract-rangosa rakkie kamrangko ka·atenga ineba Youth dilgipa matnange aganaha.
“Chief Minister Conrad K. Sangma-ni sorkaride, noktangna changgipa sapgipa nurse-rangko rakkiani palde a·palchina mikpakma nibata. Ian, sana-banani a·bako aro a·dokni manderangni namgniko sorkarini nikchanggalani ong·enga,” Marak aganaha.
Marak-ni aganani gitade, nurse-rangna training-ko on·asan cholko dakaigija, uamangna janggi tangani cholkoba dake on·na nanga. Unigimin, a·doktangni nurse-rangko bilakatna aro uamangna a·doktangon janggi tangani cholrangko on·na sorkari policy-rangko bikotna nanga ine ua party-ni palo didianiko on·aha.