Khasi-Jaintia-na 30% aro Garo-rangna 30% -ko Advisory Com de·e mesoka

SHILLONG: 19 South Shillong Advisory Committee-ni gita SRP-ni bidingo Expert Committee on Reservation Policy-na de·e mesokaha. Uamangni de·e mesokani gita, 30% reservation-ko Khasi-Jaintia –ST-na, 30% ko Garo ST-na, 27% ko Economically weaker section-na, 6% ko chaprimgimin gipin ST/SC & OBC (3% -ko gipin ST  aro 3% ko SC &OBC)-na aro 7% -ko unreserved category-na on·china de·e mesokaha.
Ia Committee elakatangni MLA Sanbor Shullai-an skotong ong·e chanchidilaha, jeon uamangni chanchie tik ka·giminko Expert Committee-na on·china gita Secretary-ni jako pakwateaha.
Committee-ni chanchie ra·chakgimin gita, Economically weaker section category-o uamangni chambagipa 27% percent reservation-oni 87% -kode Khasi, Jaintia aro Garo category-ni EWS-rangna ong·gen aro dongspa 6%-ko ST, SC & OBC-na aro 7% -ko unreserved category-na ong·gen ong·gen ine advisory committee de·e mesokaha, jeon uamangni nikani gita, uamangi de·e mesokanirang, songadam-nokadamni kangal-cholgrirangna namgni ong·gen, jemangan kamna rikanio galonanirangko man·gen.
Uamangni janapbagipa Economically weaker section-o, B.P.L nokdangrangba man·chapanggen, jeon driver, Hawker, Domestic worker, hajira ka·e cha·gipa contractual employee-rang, Asha, Anganwadi, game cha·giparang labourer-rangni dedrangrangko napatgen.
Unomitingo Sorkario kam ka·giparangni dedrangde ia Economically weaker Section category-o napangjawa.
Unbaksana a·dokonin ong·gipa pilak Non-tribal-kon OBC category-o napatchina aro Schedule caste-ko man·enggiparangko SC category-o donchina gitaba advisory committee de·e mesokaha. Unagre, 3 % reservation-ko OBC & SC-na aro 3% ko gipin ST-na chamchina gitaba advisory committee ku·pattiaha.
Unomitingo maibakae gipin ST, SC, OBC -rangoni kamna dorgasto galgiparang dongjaode, Khasi and Jaintia hills (Ri-Bhoi district-ko man·chape)-o economically weaker section-ni bak Khasi- Jaintia-ni ong·gen aro Garo Hills-o Garorangni ong·china ineba advisory committee de·e pinnikaha.