Gambegre bye-poll-o BJP susaanggen

SHILLONG:  Tura parliamentary constituency-o mijamangmang Lok Sabha election ong·atanio NPP aro BJP nangrime chakatoba chena gita man·jaha indiba saffron party ia chang Gambegre bye election-o nambate dakna ka·dongsoenga.
Ia changni somoio BJP an·tang doloni chakatna tariangenga, NPP dol Conrad Sangma-ni jikgipa Mehtab Chandee-ko bye-election-o chakatatna gimikni gitan tariangengaha.
Mehtab Chandee chakatanggenchimoba poll-o party susaangna Sombar salo Kobor ra·timgiparangna BJP dolni dilgipa AL Hek rongtalen parakangaha, election ge·antian rakgipa ong·a aro party chu·gimik bil baksa election-o susaanggen, ine ua agandapangaha.
Poll-o BJP dol maidake cheanggen ine sing·anina, Hek aganangaha, party poll-o cheangna chol donga jemangan susaangenga candidate-rangni numbor-rango pangchaka.
Chakatna sikani donggipa darangni dorgasto galarangko party man·sokuja indiba party-ni vice president Bernard Marak jean Conrad Sangma baksa batanggimin election-o sirikgipa bye-election mong·na am·enggipana party-ni ticket-ko man·a ka·dongenga.