Bhutan-ni truck garirangni a·sel Garobadha-Dalu AMPT rama nosto ong·a

Tura: Bangladesh a·song baksa international sima arini sepang jolo Garobadha-oni Dalu-ni gisepgriko rama aro AMPT-ko songdonggiparangni jakkalenggipa rama a·palbatatgipani ramarang bilongen namgijanina uamang suk ong·jaha mongsongbate a·ani niamko pe·anio chu·gimik damgni ramararangni gita dal·dalbegipa ro·ong gakgipa truck garirang re·engani a·sel rama namjaha.
South Tura-ni MLA gitcham Billykid A Sangma-na West Garo Hills-ni Dalu-o songdonggiparangni gita matnangataniko ra·baha. Uamangni salanti jakkalgipa rama (NH-51)-o Bangladesh a·songona watatna land customs station (LCS)-ni ramao pringantian dal·dalgipa dumper-rang aro trailer-rangko donani a·sel gari rama re·na chakjae changketpile dongenga, ine matnangatgipa seataha.
India baksa a·song damgnini gisepgriko Bhutan aro Bangladesh-ni gisepgriko badingchiwalgipa international badingchiwalaniko dakanio bak ong·aha, a·song damgnini gisepgriko ramako re·na mangmangsan on·angaha. A·song songreanina (transport) niamrangko agreement-o rongtalen jarikna parakataha. Indiba ong·chongmotaode, ian chu·gimikan dingtanggrikaha.
AMPT aro Garobadha – Dalu ramarang damgnian a·dok highway rama baksa 25.5 MT-mangmangkosan weight limit-ko on·aiachim. Trailer-rang aro dumper truck garirang jerangan da·o ramako salenggiparang changprak salangon 60 MT-na bate komigija salenga. Salantian truck gari bol 100-ni gita salruraenga, songdonggipa manderang ia a·selrangna neng·pilengaha.
“A·songni namgnina ku·mong nangrime badingchiwalaniko dakna ramako jakkalanina chinga maming neng·nikani dongja. Maia chingna neng·nikani ian uamang India-ni niam baksa jarikjaenga. Ramao 25.5 MT-osan salna on·aia indiba maia ong·skaenga uamang gakna on·gipana chang 2-3-ni gita gakskaenga,” ine sima ari songona uni Mongolbar salo wenangani somoio Billykit aganaha.
Ian niamgri dakasan ong·ja indiba salantio pangchake janggi tangna jakkalgipa manderangni ramarangko nosto ka·manaha, ine gitcham MLA aro Congress dilgipa aganaha.
“Ian namen ong·ja aro ia truck garirango bostu dugapile gatgiparangko nichina authority-rangko chinga mol·mola aro uamang a·ani niamrangko jarikani ning·o ga·akna man·gen,” ine Billykit agandapangaha.
Chibinana aro Rajabala-ni gisepgriko Bhutan-oni boulder truck garirang-ni gita damgni ramarangko jakkala bilongen namen nosto ka·aha. Skango Chibinang-oni Phulbari-ona minit 12-san nangaia indiba da·o iano dunagni somoiko nangaha.
“Ian namen mitchimitchi ong·ataha jeon ia ramarango rama re·na mangmangba saknaniko man·a kenchakani donga. Mikkarang waa ong·ode namjabatsranga. Chingade ma·sinan man·pilja ia truck-rangko maina ia rama gita salna on·enga. Iako chalaienggipa gimikko saoba dontongatna nanga. N·a a·ani niamko mande ra·ja ong·ode ia rama gita renan nangja,” ine Phulbari-o songdonggipa SR Sangma aganaha.
Gital nakatgipa noksarango dal·dalgipa a·klokrangko mesokata, mitam biaprango chi jroe rona nampilgen jeon skang rama tarigipao a·klokrangan dongjachim.