Pressure group-rang, CM baksa tom·aniko Dy CM paraka

Shillong: Kam ka·e cha·ani system-ni mamlani bidingo jajaenggipako namatna dingtang dingtang pressure group-rang dilgiparang card-ni bidingo Chief Minister Conrad K Sangma baksa tom·aniko Deputy Chief Minister, Sniawbhalang Dhar parakanga.
Butbar salo kobor ra·timgiparangna agana, ua official-ni gita ong·gija u·iataha je pressure group-rangni dilgiparang Chief Minister Office (CMO) baksa kamo rakkianniko dabiangaha ine Dhar aganaha.
‘‘Dingtang dingtang nangchongmotgipako aganna chinga taria jekon dingtang dingtang pressure group-rangchi aganangahachim. pressure group-rangni dilgiparang baksa CM-ni tom·anio da·o ong·enggipa a·selrangko bon·atna anga ka·dongsoenga,’’ Dhar aganaha.
Labour department-ni bako ja·manchakanirang dongnaba donga ine ku·rachakangaha, iano maiba neng·nikani donga ong·ode iako ramao namatna man·jawa aro namatani cholrangko sandiangna nang·nikaniko jinmana parakangna nanga ine ua aganaha.
Gipin biaprangoni kam ka·na re·bagiparangko kam ka·atna a·dok on·a nanga jekon songtangni labour-rang dakna ba kam ka·na man·jani gimin nirokna ba champengna nangako pressure group-rangni dilgiparangko ua mol·molaha.
‘‘A·dokni pilak namroroanina aro namdapatanina hai an·ching ku·cholsan ong·e kam ka·angna,’’ ine Deputy Chief Minister aganaha. Kam ka·na on·aniko da·o sandianiko dakenggipa namen namgijagipao ong·enga jeon gipin biaponi bang·a kam ka·e cha·na re·bagiparang a·dokko watangna nangao ga·akgen ine ua sing·anina aganchakangaha. Indakgipa namroroani kamrang private project-rangna aro sorkarinina dolgninan neng·nikaniko on·chongmotgen ine Dhar aganaha.
KSU aro gipin sinjetgipa dolrangchi lekkarangko niani ba sandianiko dakanio bang·a gipin biaponi kam ka·na re·bagiparang a·dokko watangaha ineba janapataha.
Bang·a kam ka·e cha·giparang jemangan uamangni noktangtangona a·dokko wate re·angaha ian namade ong·jaha, official-rang chanchia jeon a·dok gimiko rama project-rangko tarienggipako neng·nikatna chu·onggipa ong·a, ine chanchia.
Uamangni mitam project-rangni kamrango gipin biaponi kam ka·na re·bagiparang a·dokko wate re·anggipa ong·e neng·nikaniko man·gen ine koborna National Highways & Infrastructure Development Corporation Limited (NHIDCL)-ni a·gipi official aganangaha.
Uni parakatani gitade, Meghalaya a·dokona a·paloni jeba kam ka·na re·bagiparang jemangan re·bana aro kam ka·na sikgiparangko nengesa man·engaha.