Turao, NESLET Centre-ko songchina GSMC dabia

SHILLONG: Turao, State Level Eligiblility Test (SLET) Centre-B-ko kulichina gita Garoland State Movement Committee (GSMC) CEC, H.Q. Tura-ni dilgiparang, re·anggipa July 16 tariko NESLET Commission-ni Member Secretary-ko, Guwahati-o grongenba agangrikeaha aro examination centre-ko Tura, NEHU Campus-o kulina gita ka·donganiko on·ataha, indake apsan somoion Garo Hills-ni A·chik chadamberangna uandake a·dokni pilak chadamberangni namgnina exam centre-ko kulie on·ani bidingo mijalo Tura Campus, North Eastern Hill University (NEHU) Campus Director, Prof. J. U. Ahmed-ko grongenba memorandum-ko on·aha aro NEHU Shillong-ni Vice Chancellor baksa iani bidingo agangrikgen ine Tura NEHU Campus Director ka·dongataniko on·taha ine GSMC co-chairman Balkarin Ch. Marak aganaha.
State Level Eligibility Test (SLET)-ni gamchataniara ian graduate aro post graduate-o skigiparangna ong·a, indakgipa candidate-rangkosan Asst. Professor-ni post-na cholia ine ra·a. SLET-ko Salgro-Salaramni Assam, Arunachal Pradesh, Mizoram, Manipur, Meghalaya, Nagaland, Sikkim aro Tripura a·dokrangoba ra·enga, Marak aganaha.
Meghalayao, Shillong-ni ja·mande Tura-an, mande jelbatgipa ong·aia. Hajal chatro-chatrirang UGC-NET porikkarangna dorgastorangko galtokenga, West Garo Hills Tura-oba, North Eastern Hill University (NEHU) Campus donga aro bang·a Computer Lab-rang donga, jeon Computer Based aro Optical Mark Recognition dakgiparangko ra·na man·gen, GSMC dilgipa aganaha.
State level aro National level dakgipa porikkarangko sena gita exam centre-rang A·chik a·songode namen ja·manchakenga. Unigimin A·chik chadamberangni aro A·chik a·songo songdonggipa pilak chadamberangni namgnina North East State evel Eligibility Test (NESLET) centre damsako Tura-o kulie on·china gita chinga mol·molaha. Da·omitingo chingni A·chik chadamberangni kamgri ong·anirang bang·batroroenga, unigimin namgipa skia-pora man·gipa aro choligipa skigiparangko man·e salgro- salaramo skia poraiani a·bao mingsingako nangnika, Marak aganaha.
Shillong aro Guwahati songjinmarangona re·e porikkarangko sena nangengani gimin chatro-chatrirangna namen neng·ani ong·enga, indakani a·sel bang·a chamdamberangan korosrangni bidingo amchakjae uamangni dal·ang-chuangani salonrikako man·a, GSMC aganaha.