SHILLONG: Bangladesh-o golmalrang ong·enganio Meghalaya a·dokoni aro gipin a·dokrangoni chatro chatrirang baksa rimba-pilaniko dakangkuenga aro Meghalaya a·dokni chatro chatrirangko Sukrobar salo naljoke India a·song-tangona rimbapilna man·aha.
Sukrobar attamo Meghalaya a·dokoni sak 40-ko man·chape India a·songoni chu·gimik sak 2000 chatro chatrirang Bangladesh-oni Tripura-o Sonamura sima ariko batsotaha.
Uamang naljoke sokb-ana Meghalaya sorkarioni officialrang Tripura baksa agangrikangenga aro chatro chatrirangko naljoke rimbapilna man·na Bangladesh-o Indian Embassy-ni authority-rang baksa a·dok sorkari agangrikangenga, ine parakataha.
Sonamura-ni Deputy Commissioner (DC) aro Superintendent of Police (SP), Bangladesh-oni re·baenggipa Meghalaya-ni chatro chatrirangna cha·sik ringsikanirang aro cha·anirangko on·a tarisansoe on·aha.
Chatro chatrirangko naljokatna aro dongtoaniko on·a Sonamura sima ario super deluxe sleeper coaches garo bolgni baksa chel·chakgipa dolrangkoba tarisoaha.
Uandake naljokate rimbagipa student-rangna Khliehriat-ni Government Circuit House-o cha·ani-ringanirangko tarisoaha. Apsan daken Dawki sima ari gita sak 115 India-ni manderangko, Meghalaya-ni sak 8, Nepal-oni sak 168, Canada-oni sak 1 mandeko Bangladesh-oni naljokate rimbapilaha.
