Rongjeng: East Garo Hills District-o Nongchram Deficit UP School-o skigipako rakkianio tik ong·gijanina maio uamang matnangatachim uano Swapnil Tembe-ni niatpaniko nangnike Achik Holistic Awakening Movement (AHAM) Rongjeng unit, DSEL-na seataha.
Skigipako School Managing Committe (SMC)-ni gita namnikgipako rakkiaha, iana bang·a kragiparang dongachim ine matnangatgipao AHAM seataha.
“Chingni am·sandigipa parakat ong·aha jeon SMC an·tangni namnikgipa candidate-rangko rakkiaha aro galna sikgipa manderangoni dorgastomangmangkoba ra·chakjaha. Post-na advertise ka·ani gitade, namnikgipa skigiparang MTET ba CTET certificate dongjagenchimoba mai ong·a,” ine AHAM prakataha.
Rakkigipa skigipa uni certificate-rangni gitade, ua bilsi 41 gapaha jeon kamo rakkiani bilsi badeaha ine organization matnangataha.
Rakkigipa skigipa skango SSA skulo kam ka·aha aro ua an·tangan class-rang ra·a tik ong·janina uni kosako bang·a dingtang dingtang matnanganirang donga, ine AHAM agandapangaha.
Hindi skigipako rakkianiko dondipatchina AHAM dabiangaha, aro ia kamrangna susana aro kragipa candidate-rangna galna cholrangko gimiknan on·angna man·a gita gital dake kamo rakkianiko ong·atichinaba dabiangaha.
