TURA: Sal 70 batpilahaoba Right to Information (RTI) Act-ni ning·o sing·sandianirangna aganchakaniko on·chipkujaenga ine Garo Hills-ni social activist saksa Nilberth Ch Marak, Directorate of Family Welfare & Health Services (DFWHS)-ni kosako Chief Information Commissioner (CIC)-na badi ka·doangaha.
Ia badi ka·aniko Marak, re·anggipa July 18 tariko, CIC-na ka·doangaha.
Iana skangba ia apsan mandean, PHE-ni PIO-ni kosako, RTI ka·anina aganchakaniko on·jaha ine CIC-na badi ka·doangahachim.
Nilbert Marak-ni CIC-na badi ka·doangani gitade, ua re·anggipa May 24 tarikon DFWHS-ni PIO-na RTI ka·e dingtang dingtang kamrangni bidingo sing·sandianirangko dakahachim indiba uni RTI ka·aoni sal 70 batpilahaoba department-ni PIO una aganchakanirangko on·chipjahani gimin ua CIC-na badi ka·doangaha.
“RTI Act 2005-ni Section 18(b)-ni ning·o anga DFWHS-ni PIO-ni kosako mokordomako ka·aha maina uamang angni dorgastoko man·soaoni sal 30-ni gisepon angna aganchakanirangko on·na nangachim indiba da·o sal 70 batpilahaoba uamang angna maming agan-talatanirangko on·chipjaha,” ine Nilberth Marak parakataha.
Uni RTI-na maini a·sel aganchakanirangko on·na man·chipkujaenga, uarangni giminba department-ni gita una maming talatanirangko on·jaha ineba Marak parakataha.
“RTI Act-ni ning·o department-ni kamrangko talate on·aniara PIO-ni daitoan ong·achim indiba uni ia kamko gelaniara RTI-ni niamrangko pe·ani gita ong·enga. Uni gimin department-na nanga gita u·iatanirangko on·china aro PIO-ni kosako nanga gita ja·kurangko de·china chinga CIC-ko didienga,” ine Marak parakataha.