TURA: East Garo Hills a·jani Dareng Akep minggipa songo Jal Jeevan Mission (JJM)-ni kamrangko name ka·jahani a·sel songni manderang chirangko man·tokjaenga ine Garo Hills Youth Solidarity (GHYS) minggipa dol matnangataha.
“Wachini somoirango chirang banpilengon JJM-ni pipe-rang gita chirang jokjaenga ong·ode Garo Hills-o JJM-ni kamrangko name chu·sokatjaengasa ong·aha,” ine GHYS-ni president Endick Marak parakataha.
Marak-ni parakatani gitade, Dareng Akep songo JJM-ni kamrangko ka·anio, chi pipe-rangko salna gitaba maming cholrangko donjaha aro chi pipe-rang gitaba chirangan jokjaengachim.
“Ia songo JJM-ni dongimin niam gita chi pipe-rangkoba chu·onge on·jahani gimin kamrangko ka·anio contractor aro officer-rang, ‘kragija’ dake kamko matchotataha. Ia songo JJM-ni kamrangko matchotaha ine a·kangengoba songni manderang da·alonan chiko chu·onga gita man·tokjaenga,” ine GHYS-ni president matnangataha.
Ia songo ka·gipa JJM-ni kamrangko sandirokchina aro kamko jako ra·e ka·gipa contractor-ni kosako nanga gita ja·kurangko de·chinaba ua dabiangaha.