AMPATI: Mongolbar salo, a·dokni Chief Minister Conrad K Sangma, South West Garo Hills a·jani Mellim songo Apiculture Multi Facility Centre-ko rikna gita pangchakaniko songe on·angaha aro ia pangchakaniko songanio, a·dokni Education Minister Rakkam A Sangma, Mahendraganj MLA Sanjay A Sangma, South West Garo Hills a·jani Deputy Commissioner Hema Nayak, district official-rang, Mellim joloi bija jile cha·enggiparang aro songni gipin manderangba dongpae bak ra·angtokaha.
Ia Apiculture MFC-ko rikna gita gong crore 1.52 tangkarangko a·dok sorkari chame on·aha aro ia salo sanction order-ko a·dokni Chief Minister, Mellim songni Beekeeping Society-na pakwate on·angjolaha.
Mellim jolo bija jile cha·enggipa manderang sak 200-mangni gita donga aro ia Apiculture MFC-ko re·anggipa July-ni 6 tariko, a·dokni Chief Minister, Mellim jolona re·bae bija jile cha·enggiparang baksa agangrikanio uamangni mol·molanio pangchake rike on·na tik ka·aha.
Ia Apiculture MFC-ko rikna pangchakaniko songe on·angani somoio a·dokni Chief Minister, jinmana aganprakangengon, manderangni janggi tangani gadangko tang·doatna aro manderangni bading chiwalanirangko namdapatna gita miksonganio sorkari, ia Apiculture Multi Facility Centre-ko rikna gong crore 1.52-ko chame on·na tik ka·aha ine parakataha.
Ia Apiculture MFC-ko rike on·anichi Mellim jolrango bija bitchi man·aniko bariatna aro namgipa bija bitchirangko man·na dakchakani ong·gen ineba Sangma an·tangni ka·dongchakenganiko parakataha.
CM office-ni ning·o dingtang dingtang program-rangko mission mode-o ra·dona sorkari, Apiculture ba bija jilani, Mushroom ba me·gimu ge·ani aro Floriculture ba pul ge·aniko mongsonggipa program-rang dake seokaha ineba ua aganaha.
Ia program-rangko Khasi Hills, Jaintia Hills aro Garo Hills gimikon a·bachengatgen ineba Chief Minister aganaha.
