TURA: Chengonin Garo Hills-o ‘sam kal·aka’ ba ‘montol daka’ ine chanchichipenba, badiaba badiaba songrango manderangko jinma dokgrime galanirang aro songoniko a·rike galanirangko nikna man·engon, da·oba changsataie West Garo Hills a·jani Dadenggre police station ning·o donggipa Sathegre songo, nokdang ge·sani manderangko, ‘montol dakgiparang’ ine potchipenba songoniko a·rikgalaniko knasona man·taiaha.
Koborko on·ani gitade, ia obosta re·anggipa 2023 bilsini December jaon ong·ahachim.
Songni manderang, Ringnalin M Sangma minggipa mandeni nokdangko ‘montol dakgiparang’ ine potchipenba walni somoion songoniko a·rikgalataha aro ia nokdangni manderangko, nokni bostu aro tangka paisamangmangkoba ra·bitangna on·jaha ine kobor on·aha.
Ia nokdango, nokni ma·a paa baksana class 12-o poraienggipa aro class 5-o poraienggipa dedrang sakgni dongachim indiba songoniko a·rikgala man·e ia bi·sarang, an·tangtangni poraianiko dontongna draatako man·aha.
Sathegre songoniko a·rikgalata man·ani ja·man ia nokdang, Chiading songo dongnapena man·aha indiba tangka paisarang aro an·tangtangni gamchatgipa bosturang dongjae, jasnina kingking neng·bee janggi tangna nangaha.
Uandaken jasnimangna Chiading songo dongnapeani ja·man, ia nokdangni manderang, songni manderang nokchaksopilgnokkon ine ka·dongenba songtangona re·angpilahachim indiba songni manderang, ia nokdangona re·bae, re·anggipa July-ni 14 tariko songoniko, maming tangka paisa aro uamangni gamchatgipa bosturang gri a·rikgalattaiaha.
Iandake songoniko a·rikgalattaiako man·ani ja·man ia nokdangni manderang, songsalna dangdike on·enggipa Jaynie N Sangma-ona re·bae, dakchakanirangko on·china mol·moleaha.
“Uamang jako maming grisa angona re·baaha aro uamango cha·namangmang donggijako nike anga namen aiao inmanbeaha. Uamangni angna aganani gitade, uamang Dadenggre police station-ona re·ange ku·sikchide badi ka·eahachim indiba uamangni badi ka·aniko police-rang dal·e ra·jaha. Ia nokdang, gue aro gul muris baganko dakanio namen choligiparang ong·achim aro unbaksana uamango jila kaanirangba chu·onga gitan dongachim indiba uamang noktangona re·angna man·jae da·o uamangni jako mamingan dongjaha,” ine Jaynie parakataha.
Ia nokdangna ong·a obostako ma·siani ja·man ua ia nokdang baksa Tura police station-ona re·ange badi ka·eaha aro ia a·selni bidingo knasoani ja·man West Garo Hills a·jani SP Abraham T Sangma an·tangan case-ko jako ra·enba July-ni 22 tariko mokordoma ka·e, ia case-ko Dadenggre-ni SDPO-na pakwate on·ataha.
Koborko on·ani gitade, ia nokdangko ‘montol dakgipa’ ine potenba songni manderangko ding·chaoatgipa mandeara songni pamongan ong·achim.
Indake ong·engon, ia nokdangna kakket bichalko on·na aro ia nokdangko songtang noktangona watatpilna man·na gita ia a·selni bidingo Mangsang Maharini manderangko jako ra·e niatchina gita police-rangba didiataha.
