SHILLONG: Shillong songjinmao ranta ong·pilgipa petrol bomb-chi chadrapani pil·tai a·bachengtaiaha, jeon denggu manderang Mawbah-o donggipa mande saksani nokko Bristibar pringo petrol bomb galdapaha.
Ia a·sel ong·aniko mijal pring 7:30-8 bajini somoio police-na u·iataha, jeon Julie Lyngdoh-ni nokko ma·sina man·gijagipa denggu manderang petrol bomb galdapaha ine East Khasi Hills SP, Sylvester Nongtnger aganaha, je nokon gipin jatrang para dongengachim.
A·selrangko sandianiko dakenga, gopretatanio maming nosto ong·anirangde dongjaha ineba Nongtnger aganaha.
“Chinga pilak cholrang gitan sandianiko dakenga, ia a·sel ong·aniko Lumdiengjri Police Station-o segataha,” ine SP aganaha.
U·iatani gita denggu manderang buringchipakni re·bae petrol bomb-ko galdapangaha.
