SHILLONG: Garo Hills-ni mitam manderang, Voice of the People’s Party (VPP)-koba da·o ong·atna sienggipa Gambegre Assembly constituency-ni by-election-o susachina nangnikengoba da·o dipet Garo Hills-o VPP-ni bipekko songna gita uamang sikkelkujawa ine VPP-ni president Ardent Miller Basaiawmoit parakataha.
Basaiawmoit-ni aganani gitade, VPP-ni miksongani aro bebera·anirangko Garo Hills-ni manderang ma·sichenggijade uamang Garo Hills-o VPP-ni bipekko songna nangnikkujaenga.
“Khasi Hills-o jekai manderang chingni miksonganirangko ma·sichengesa chingko ra·chakahachim apsan daken Garo Hills-oba chinga chingni miksonganirangko ma·sichengchina nangnikenga. Chinga Garo Hills-ona re·anggenchimode chingni miksonganirangko talate on·gen,” ine VPP president aganaha.
Garo Hills Autonomous District Council (GHADC) election-o susagenma susajawa ine sing·anina aganchakaniko on·angskaengon, da·o dipet uamang, 2028 bilsini Assembly election-nasa gisik on·batchenggen ine Basaiawmoit parakataha.
“Indake ong·genchimoba mikkang salrango aro jarango mai ong·gen da·o dipet chinga mamingkoba agansona man·kujawa,” ine ua aganskaaha.
Basaiawmoit-ni aganani gitade, salgro salaramni dingtang dingtang biaprango donggipa dilgiparangba, VPP-ni miksonganirangko namniktokengachim.
Tripura a·dokni mitam Tribal dilgiparangba VPP-ni dilgiparangko grongna nangnikenga ine janapatengon, adita salrangna skangsan VPP-ni dilgiparang, Mizoram a·dokni ZPM dolni dilgiparangko aro Assam-ni Tribal dilgiparangkoba grongaha ine Basaiawmoit parakataha.