SHILLONG: Khasi Students Union (KSU) aro dingtang dingtang dolrangni, a·dokona re·bae kam ka·e cha·enggipa manderangoniko nanga lekkarangko am·sandiani ja·man a·doko kam ka·e cha·enggipa bang·a manderangan a·dokoni re·ongkatangtokengahani a·sel bang·a kamrangan ja·donggaatako man·na nangengahani gimin NPP-chi dilenggipa MDA sorkariko ‘tangka jakkalsretanirangna’ Meghalaya Pradesh Congress Committee (MPCC)-ni president Vincent H Pala matnangataha.
“Sorkarian tangka ‘cha·rakgipasa’ ong·ode manderang sorkarini kosako chakataigen aro manderang grengkosa rikaigen. Meghalaya a·dokode be·en dongjaha indiba grengrarasaha,” ine Pala aganaha.
Dingtang dingtang dolrangni, kam ka·e cha·enggiparangoniko lekka am·sandienganina kam ka·e cha·enggiparangni katpripana a·bachengengani gimin janapatengon, a·dok sorkarian kamtango gisik nangjaenga ong·ode, niam retirangko nirokanio olgrokaigen ine Pala aganaha.
“Sorkari ‘tangka cha·rakgipa’ ong·ode a·doko so·sojengjeng ong·anirangba dongaigen maina gimikan an·tangtangni pocket-rangko gapatnasa gisik nangtokaia indiba a·dokni manderangnade simsaktokja. Ian namen jajrengna nangani ong·enga,” ine ua aganaha.
A·doko ong·enggipa obostarangko jako ra·na changjaenga ine a·dok sorkariko matnangatengon, “Uamang (sorkari) manderangni namgnina sko saani pal an·tangtangni neng·nikanirangnasa sko saskaenga,” ine MPCC-ni president parakataha.
Gipin biaprangoni re·bae kam ka·e cha·enggipa manderangoniko dingtang dingtang dolrang, lekkarangko am·sandiengani gimin sak 2500-na baten kam ka·e cha·enggipa manderang, Meghalaya a·dokoni re·ongkatangtokahachim aro iani a·selan ma·mong sorkarini sanction ka·gipa dingtang dingtang project-rang da·o ja·donggaatako man·na nangskaengahachim.
Ia project-rangko jako ra·e ka·enggipa mitam contractor-rangni aganani gitade, a·dokona re·bae kam ka·e cha·enggipa manderangoni 90 percent-ni gitade, songtang noktangtangona katangpiltokahachim.
Meghalaya a·doko Inner Line Permit aro Meghalata Residents Safety & Security Act-ko sorkari ra·gate on·na man·jaengani gimin gipin biaprangoni re·bae kam ka·e cha·enggipa manderangko nirok sandina nangenga ine NGO-rang a·kangskaengachim.