TURA: East Garo Hills a·jani Mangsang bazaar committee-ko jolni MDC-sa an·tangni skani gita songaha ine matnangenba, jolni dingtang dingtang NGO-rang, Mangsang-o songdongenggipa manderang baksa jinma tom·bimonge re·jomaniko ong·atangaha.
Ia tom·bimonganiko Mangsang-ni GSU, FKJGP, AHAM, Joint Action Committee aro gipin dolrang nangrime ong·atangaha aro ia tom·bimonganio Mangsang bazaar-o dokkan dake cha·enggipa aro gipin bading chiwale cha·enggipa manderangba bak ra·angtokaha.
Mangsang NGO-rangni parakatani gitade, songni manderang an·tangtangan an·tangtangni namnikani gita bazaar committee-ni dilgiparangko seoke jolni MDC Henendro R Sangma-na on·atahachim aro songni manderang changgittamna kingking an·tangtangni seokgimin bazaar committee-ko on·atahaoba MDC, an·tangni skani gitasa bazaar committee-ko songskaahachim.
“Bazar committee-o songni manderangna simsam nirokgipa joltangni bading chiwalgiparangko songna chinga changgittamna kingking tom·aniko ong·ataha aro chinga changgittamna kingking MDC-koba iani bidingo grongahachim. Indiba ua chingni seokgimin membor-rang ra·chakgija an·tangni skani gita NPP-ni membor-rangkosa bazaar committee-ni dilgiparangna seokaha,” ine GSU Mangsang unit-ni president Barnawell R Sangma parakataha.
India a·songara jakgitelgipa a·songsa ong·ani gimin manderang an·tangtangni namnikgipa dilgiparangko seokna bil dongachim indiba jolni MDC an·tangni skani gitasa bazaar committee-ni dilgiparangko seokskaaha ine FKJGP Mangsang circle-ni president George D Sangma-ba suk ong·gijaniko parakataha.
“Da·alo NPP sorkariko chalaiengani gimin iandake bilko mesokaniara kraani ong·ja maina mikkangchi Congress, TMC ba BJP dolrang sorkariko chalaiskagenchimode uamangba iandake apsan ja·kurangko de·na man·aigen,” ineba ua aganaha.
Jinma re·jomaniko dakna skang, tom·bimonganio bak ra·gipa manderang jinma MDC-ni kamna suk ong·gijaniko mesokna gita uni bimangko tarienba so·e galaha.
“Chinga badiaba political dolni kosako jegalenga ong·ja indiba manderangni nangnikaniko mande ra·na nanga. Chingni chonbegipa bazaar-ko chinga iandake political dolni jakchi dilna on·jawa,” ine JAC-ni president Sebiush R Marak parakatskaaha.
