BAGHMARA: Baghmara-ni district transport officer (DTO) kamtangko name ka·jaenga aro niam gri check gate-rangko songe manderangoniko tangka gile ra·enga ine A·chik Conscious Holistically Integrated Krima (ACHIK) matnangatenba, ia officer-ko dingtang biapona apjitatchina aro uni kosako niamo pangchake ja·kurangko de·china a·dokni Chief Minister-na sedoataha.
Iani bidingo a·dokni Chief Minister Conrad K Sangma-na badi ka·e sedoatengon, Baghmara-ni DTO, kamtangko name ka·jaenga aro dingtang dingtang biaprango check gate-rangko songe, tangka paisarangko gile ra·engani a·sel manderang neng·nikanirangko chagrongna nangtokenga ine ACHIK dolni vice president Greneth M Sangma parakataha.
“Niam gri check gate-rangko songe gari nokgiparangoniko tangka paisa gile ra·enga ine bang·en chinga badi ka·anirangko man·soaha. Ia DTO-ni kamrangni a·sel manderang bang·en neng·nikanirangko chagrongna nangtokenga aro bang·a manderangan an·tangtangni driving licence aro registration certificate-rangko bilsisa batpilona kingkingan man·chiptokkujaenga. Motor vehicle inspector (MVI) aro police-rangni salanti garirangko nirikkianichiba manderang neng·nikanirangko chagrongna nangtokenga aro ia pilakan DTO-ni ge·etani a·selan ong·enga,” ine Chief Minister-na badi ka·e sedoatgipa chittio ACHIK dolni vice president parakataha.
