AMPATI: South West Garo Hills a·jao donggipa Betasing C&RD Block-ni Block Integrated Development Complex-ko Bristibar salo, a·dokni Chief Minister Conrad K Sangma nokdonggae on·angaha aro ia gital nokko nokdonggae on·anganio, a·dokni C&RD Minister AT Mondal, Salmanpara MLA Ian Botham Sangma, Mahendraganj MLA Sanjay A Sangma, Rangsakona MLA Subir Marak aro gipinrangba dongpae bak ra·angtokaha.
Betasing C&RD Block-ni gital office nokko nokdonggae on·anganio a·dokni Chief Minister, jinmana aganprakangengon, ia Block Integrated Development Complex-ko ta·raken matchotatahani gimin ia complex-ko rikanio jak donggipa pilak dolrangkon mittelpilangaha.
2018 bilsio an·tangni Chief Minister ong·e jako ra·chengani somoio sorkari office-rangni obostarangni gimin janapatengon, ua somoio sorkari office-rang, LP skulrang, PHC aro CHC-rango chu·onggijanirangko Sangma janapangaha.
Chu·gimik dingtanganiko ra·bana gitade somoiko nangaia ine janapatengon, sorkarini kamrangko manderangna nambate dangdike on·na man·na gita office nokrangkoba nambatatna nangchongmota ine Chief Minister parakataha.
Bang·bata department-rangna sorkari, gital office nokrangko on·engaha ine janapatengon, ia bilsini gisepon mitam office nokrangkode nokdonggae on·na ka·dongenga ine Sangma parakataha.
Ia tom·anio a·dokni C&RD Minister AT Mondal-ba jinmana aganprakangengon, sorkari office-rangko namdapatna gita rakbee kamrangko ka·dilengani gimin a·dokni Chief Minister Conrad Sangma-ko mittelpilangaha.
