TURA: Amalgamated Deficit Higher Secondary School Funding-ni ning·o secondary section-ni skigiparangna dormaharangko bate on·enba higher secondary skigiparangnade adhoc grant-in-aid-mangmangkosan on·skaenga ine Bristibar salo All Meghalaya Minority Students Union (AMMSU) talataniko on·china, Education department-ni Commissioner & Secretary-o dabiataha.
Iani bidingo Education department-ni Commissioner & Secretary-na sedoatengon, apsan skulni ning·o aro apsan management-ni ning·o maini a·sel skigiparangna dormahako dingtange on·na nangenga ine AMMSU sing·doataha.
“Ia skulni secondary section-o skigiparangnade deficit grant-o gong 80,000-oni gong 1,50,000-ona kingking on·enga indiba higher secondary section-ni skigiparangnade jao gong 33,000-mangmangkosa on·skaenga. Skulni chowkidaran gong 45,000-ko man·engani gimin higher secondary section-ni skigiparangna batede dormaha bate man·enga,” ine AMMSU-ni president, suk ong·gijaniko parakataha.
Meghalaya a·doko iandake skigiparangna dingtange dormaha on·enggipa skulrangko see on·china didiatengon, skigiparangni iandake dormaha apsan ong·gija man·aniko namatna gita sorkari mai ja·kurangko de·enga ine AMMSU, Education department-ni Commissioner & Secretary-o sing·doataha.
Ma·mong sorkarini dongimin niam gita Meghalaya a·dokni high school section-rango National Education Policy (NEP) 2020-ko ra·gatkujaengani gimin suk ong·gijaniko parakatskaengon, iani bidingo maming ja·kurangko de·jagenchimode nanga gita kamrangko jako ra·na draatako man·gen ine AMMSU mikrakataniko on·ataha.