Adita bilsirangni gisepon sak 1000 chadamberangko gipin a·songrango kam ka·na watatgen: CM
TURA: Gipin a·songrango kam ka·na sikenggipa chadamberangna Sukrobar salo, Overseas Placement Job Fair-ko Tura-ni District Auditorium-o ong·atangaha aro ia Job Fair-ko ong·atanio bang·bea A·chik chadamberangba bak ra·angtokaha.
Ia Job Fair-ko ong·atanio, a·dokni Chief Minister Conrad K Sangma, jinmana aganprakangengon, da·o bilsi gittam ba bilsibrini gisepon a·dok sorkari, sak 1000 chadamberangko, Japan, UK, Singapore aro Saudi Arabia gita dakgipa a·songrango kam ka·e cha·na watatna man·gnok ine parakataha.
Gipin a·songrango kam ka·e cha·na sikenggipa chadamberangna training-ko ra·anio sorkari tangka paisani gita dakchakgen aro visa-rang baksana dingtang dingtang nanga lekkarangko man·e on·na dakchakgen ineba Chief Minister parakataha.
“Sorkarini gita chinga chingni chadamberangko dingtang dingtang agency-rang baksa nangrimatna jak on·aha aro chadamberangni gipin a·songrango kam ka·e cha·na training-rangko ra·anio chinga gong 50,000-ona kingking tangka paisani gita dakchakanirangko on·gen. Gipin a·songrango kam ka·e cha·na gita chinga chadamberangna visa-rangko aro gipin nangchongmotgipa lekkarangko man·e on·na gitaba dakchakgen,” ine Sangma aganaha.
Gipin a·songrango kamrangko ka·na gita chadamberangko nangbatengani gimin a·dok sorkari, a·dokni chadamberangko gipin a·songrango kamrangko ka·e cha·na cholko on·na tik ka·aha ineba Chief Minister aganaha.
Chief Minister-ni parakatani gitade, sak 1000 chadamberangko Japan, Singapore aro UK gita dakgipa a·songrangona kam ka·e cha·na watatna man·genchimode uamang japrakon gong lak 1.2-mangni gita dormahako man·e tangka paisarangko chimongna man·gnok.
Tang·dogimin a·songrango songdongenggipa manderangoni bang·batan bilsi re·angengaha aro kamrangko ka·na gita chadamberang chu·ongja ine janapatskaengon, Meghalaya a·doko chadamberangan bang·batani gimin training-rangko on·e aro sorkarini gita nangchongmotgipa lekkarangko on·e gipin a·songrango kam ka·e cha·na watatna chol ong·enga ine Chief Minister aganaha.
“Japan a·songni Kobe-o kam ka·enggipa Meghalaya a·dokni nurse sakgni, ua biapo kam ka·na cholko man·engahani gimin namen kusi ong·enga aro anga an·tangan uamangko Kobe-o grongbae, hospital-ni official-rangkoba grongbaaha. Ia hospital-mangmangon sak 700 nurse-rangko bilsiprakon nangenga aro Japan a·songo kamrangko ka·na gita chadamberang chu·ongjani gimin uamangna chadamberangko nangenga,” ine Sangma aganaha.
Adita jarangni gisepon, a·dokni sak 27 chadamberangko Japan a·songo, sak 44-ko Singapore-o aro sak 50 chadamberangko UK a·songona nurse-ni kamko ka·na watatgnok ineba Chief Minister parakataha.
Kamrangko skie ra·na, ku·sikrangko skie ra·na aro kamo donatna gita namgipa agency-rangko sandichina a·dok sorkari, Meghalaya Skill Development Society (MSSDS) aro Labour, Employment & Skill Development Society Department-na kamko pakwatmanahani gimin chadamberang jajrengna nangjawa ine Chief Minister aganaha.