Shillong: Dam Rehabilitation & Improvement Projects (DRIP)-ni ning·o Umiam dolongko tariani kamrang baditana kingking chu·sokaha, uako nirokna gita A·dokni Power Minister Abu Taher Mondal, sorkarini gipin official-rang baksa mijalo re·angaha.
Kam ka·anirangko nirokna re·angani somoio Power Minister, kam ka·anirang baditana chu·sokangaha uarangni bidingo nipilatenba chanchirimaniko dakaha. Chanchirimanio, Power Department-ni Commissioner aro Chairman-cum-Managing Director of Meghalaya Energy Corporation Limited (MeECL) Secretary Sanjay Goyal, IAS, aro Director Generation MePGCL Bloomingstar Wahlang aroba MeECL-ni mongsonggipa official-rang aro ITD Cementation-ni official-rang dongpaaha.
Ia ja bon·achide dolong gita jakgitele songrena man·aignokkon ine ka·donganiko Minister aganaha aro basakonimancha garirangko chu·gimik watgenchim, uko high-power committee Sombaro tom·e chanchigen ineba Minister aganaha. Ua tom·anio, IIT Guwahati-ni consultant, Director General of Police, PWD official-rang, aro East Khasi Hills aro Ri Bhoi district-ni District Administration representative-rang dongpagen, ua aganaha.
Dolongni naljokgni aro baignina bangki dongenggipa kamrangkoba namedake aro gong·rake matchotani giminba Minister aganaha.
Da·sikkari December 14 tarikonin Dam Rehabilitation & Improvement Projects (DRIP Phase II & III)-ni ning·o dolongko taridapani kamrangko a·bachengataha ine nikna man·a.
