All Assam Students’ Union(AASU) aro Khasi Students’ Union(KSU) so·sojengjeng ong·aniko nikenga jeon Assam-oni tourist gari salgiparang, private aro commercial register ka·gipa garirangko Meghalaya-ni dingtang dingtang biaprango dondipataniko dakenga aro a·dokona napbaako champengsoenganina chanchirimaha.
Bilongen gisiko nangatani baksa ong·enggipa mamlana North East Students’ Organization (NESO), AASU aro KSU-ni dilgiparangni gisepgriko agangrikaha. Apsani gimin agangrikangaha, KSU indake aganaha, Assam-oni garirangko dondipatgipa kamrangni gimin origanisation mamingkon ma·sija aro indakgipa ja·ku de·anirangna maming ge·etaniko on·a dongja ine aganaha. Maming jajrengani grian Meghalaya a·dokona Assam-oni tourist garirang manderangko salbana nanga. Assam aro Meghalaya a·dokni sorkarirang ia mamlani bidingo agangrikna nanga aro pangnajolna namataniko dakna ra·bana nnanga. Ramram dakgipa ma·siani gisiko aro ripeng dake bakrimaniko name dake rakkina dolgni a·dokrangoni tourists’ taxis association-rang mol·molangaha. Iani bidingo KSU namgipa ja·kuko de·gen.
Assam aro Meghalaya damgni songsal a·dokrang ong·a ine AASU-ni president Utpal Sarma, general secretary Sankor Jyoti Barua aro KSU-ni president Lambokstarwell Marngar, general secretary Donald v Thabah apsan nangrime press conference-o aganangaha. Niamgri gipin a·songrangoni napdrapanina apsan dakgipa neng·nikani baksa dolgni a·dokrang chagronggipa ong·e Assam aro Meghalaya a·dokrangni manderangni gisepgriko bilakgipa meli-nangrimgrikanina KSU aro AASU-ni kam ka·na miksongani donga. Dolgni a·dokrangnio skang chasongoni Assasmese aro Khasi jatrangko chel·chakna aro janggi tangna uamangni mol·molanio dolsa dolgipin baksa AASU aro KSU pangnan dakchakgrika. Ia re·mikkanganiko mikkangchi ripingangna jotton ka·na chinga on·kanga, ine uamang aganaha.
