SHILLONG: Adita jarangni gisepon ong·atna sienggipa Gambegre Assembly by-election-o NPP dolko man·chape pilak dolrangna chena krenggenchimoba Congress dolnan chena gita cholrang nambatenga ine Robibar salo, Meghalaya Pradesh Congress Committee (MPCC)-ni president Vincent H Pala parakataha.
“Chinga rake kamrangko ka·na nangenga indiba ia pilakan manderangni nangnikaniosa pangchakaigen. By-election-ode pangnan sorkariko chalaienggipa dolrang chena gita krengronga. Ia by-election-o pilak dolrangan candidate-ko susaatgen indiba obostarangko nigenchimode Congress dolnan cholrang nambatkuenga,” ine Pala aganaha.
Lok Sabha election-o Congress dolni Saleng A Sangma-ni cheaniara Congress dolna dal·bea cheani ong·aha ine janapatengon, ia by-election-oba Congress chegipa ong·na rakbee kamko ka·na nangkugen aro kamrangko a·bachengengaha ine MPCC president aganaha.
Gambegre by-election-na Congress dolni candidate-ko seokani gimin sing·anina aganchakaniko on·angengon, candidate-ko seokna gita Congress dol, dorgastorangko okamna a·bachengataha ine Pala parakataha.
“Gambegre by-election-o susana sikenggipa candidate-rangna chinga lekkako seatenba, dorgastorangko bi·ataha. Da·o dipet Tura-ni MP Saleng Sangma Delhi-o ong·kuenga aro budget session-ni ja·mansa chinga asonge chanchienba nanga gita ja·kurangko de·anggen,” ine Pala aganaha.
Candidate-rangni bimingko aganna jechakatengon, bimingrangko block-rangonisa district-ona watatgen aro district-onisa uamangona watatskagen ine MPCC-ni president parakataha.
Re·anggipa April jao ong·atanggipa Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·ahachim aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko jadokni gisepon seoktaina nangengachim.
 |
ReplyForward
|