TURA: Re·anggipa July-ni 16 tariko Shillong-o donggipa MBOSE guest house-o kam ka·enggipa mande saksako kragija dake dokani gimin Rangsakona-ni NPP MLA Subir Marak-ni kosako Tura-ni social activist Cherian Momin, National Human Rights Commission (NHRC)-na badi ka·e sedoataha.
July-ni 16 tarik pringwalni 2:00 bajimango Rangsakona-ni MLA Subir Marak, MBOSE guest house-ni gate-ko oningjahani gimin guest house-ni chowkidar-ko kragija dake satkapahachim aro an·tangni ra·bitgipa pistol-koba mesokahachim. Ia a·sel ong·aniko CCTV camera-o man·rikaha aro uandaken ia MLA-ni kragija dakanina dingtang dingtang dolrang aro a·doko songdongenggipa manderangba suk ong·gijaniko parakattokahachim.
Ia MLA-ni kragija dakgipa kamko manderang jegaltokahaoba da·alona kingkingan uni kosako a·dok sorkari ba police-ni gitaba maming ja·kurangko de·kujaengachim.
Indake ong·engon, MBOSE guest house-o kam ka·enggipa mandeko kragija dake dokahani gimin aro an·tangni ra·bitgipa pistol-ko mesoke ka·mikkenatahani gimin ia MLA-ni kosako Tura-ni social activist Cherian Momin, NHRC-na badi ka·doangskaaha aro ia a·selni bidingo sandirokanirangko dakenba, MLA-ni kosako nanga gita ja·kurangko de·china dabiangaha.
“MLA aro uni manderangni guest house-ona sokangani somoio, guest house-ni chowkidar, jean Garo Hills-oni ong·achim, ua tusimiting ong·e guest house-ni gate-ko oningna man·jaha. Gate-ko oningjahani gimin ia MLA, guest house-ni chowkidar aro uni jikgipako kragija kattarangchi saina a·bachengaha aro ja·mano uko kragija dake jak sokaha. Jegrikengmiting somoio ua an·tangni pistol-koba mesokaha aro ian namen kragijani ong·aha,” ine Momin, NHRC-na sedoatgipa chittio talataniko on·ataha.
Jegrikengmiting somoio MLA-ni mesokgipa pistol-ara niam gita ra·bitgipa ong·ama ong·ja, uni giminba sandirokchina Momin didiataha.
Ia a·selni bidingo dolgnini songgigrikanikoba sandirokchina Momin didiataha.
