TURA: An·tangna on·gimin bilko jakkalsreta ine matnangenba, A·chik Conscious Holistically Integrated Krima (ACHIK)-ni president Thomas M Marak-ko ra·galataha aro ACHIK-ni vice president Greneth M Sangma-ba matnanganirangko man·ahani gimin kamtangko watskaaha ine ACHIK doloni kobor on·aha.
Koborko on·ani gitade, re·anggipa Sonibar salo ACHIK dolni dilgiparang tom·e chanchirimangenba, ACHIK-ni president-ko kamoniko ra·galna tik ka·angaha.
Iani bidingo ACHIK-ni president Thomas M Marak-na seachi u·iatengon, ACHIK-ni ra·gatgimin niamrangni kosako re·badea, niam gri unit-rangko ra·chaka aro ACHIK-ni dongimin niamrangko pe·e bilrangko jakkalsretaha ine matnanganirangko man·ahani gimin uko kamoniko ra·galna tik ka·aha ine ACHIK-ni dilgiparang parakataha.
President-ni kosako matnanganirangko sandirokna gita inquiry committee-ko songaha ine janapatengon, da·o dipet president-ni kamrangko ACHIK-ni working president aro general secretary jako ra·angskagen ine ACHIK-ni dilgiparang parakataha.