TURA: A·chik Conscious Holistically Integrated Krima (ACHIK) dolni president Thomas M Marak-ko ra·galanina ACHIK dolni dingtang dingtang unit-rang, chong·motan Rajabala, Selsella, Tikrikilla, Dadeng, Babadam, Nongal, Baghmara aro Rongmil unit-rang, suk ong·gijaniko parakattokaha.
ACHIK-ni ra·gatgimin niamrangni kosako re·badea, niam gri unit-rangko ra·chaka aro ACHIK-ni dongimin niamrangko pe·e bilrangko jakkalsretaha ine matnangenba, adita salrangna skangsan ACHIK-ni president Thomas M Marak-ko ACHIK-ni executive committee ra·galatahachim ine nikna man·a.
Indake ong·engon, Marak-ko president-ni kamaoniko ra·galahani gimin kosako janapgimin ACHIK-ni unit-rang suk ong·gijaniko parakatskaaha aro ian niamo pangchake seoka man·gimin dilgipako ra·galani gita ong·aha ine matnangataha.
Indake ong·engon, maini gimin ACHIK-ni president-ko ra·galahachim, chu·gimik a·selrangko talatchina, iani bidingo kakket ong·e sandirokchina aro inquiry-ko matchotani ja·man ia president-ko kamo ra·pilchina gitaba kosako janapgimin ACHIK-ni unit-rang dabiangaha.
“Constitution-ko draft ka·chenggija maikai ra·galani niamko dakna man·a? Constitution-ko draft ka·aha ong·ode maini gimin iako ra·chakjaha? Maikai adita sak membor-rangmangmang tom·e president-ko ra·galna man·a? Doltangni ning·o ong·enggipa obostarangko maini gimin songbadrango parakna nanga? ACHIK dolni constitution-ko sebebeaha ong·ode maini gimin pilak unit-rangan constitution gri chalaienga?” ine ia ACHIK-ni unit-rang sing·doataha.
Ra·gala man·gipa ACHIK-ni president baksa ong·angkugen ine janapatengon, ACHIK dolni gipin unit-rangkoba iano bakrimchina gita kosako janapgimin unit-rang didiataha.
