TURA: North Garo Hills a·jani headquarter Resubelpara jillao donggipa bang·bata ramarangan obosta namsrangjaengahani a·sel jolo songdongenggipa manderang neng·nikanirangko chagrongna nangtokenga ine Tura-ni saksa social activist Cherian Momin parakatenba, ia jolo songdongenggipa manderangni namgnina ia ramarangko ta·raken taripile on·china a·dokni Chief Minister Conrad K Sangma-ko didiataha.
Momin-ni parakatani gitade, Resubelpara-o namjabatsranggipa ramarang aro taridapna nangenggipa ramarangara, North Garo Hills a·jani Deputy Commissioner (DC) office-ona dakanggipa rama, DRDA office-ona dakanggipa rama, PWD office-ona dakanggipa rama, Resubelpara Municipal Board (RMB)-ona dakanggipa rama, DC office sambao donggipa Resu Rome Rabha rama, DC office sambao donggipa Jonglapara rama aro Dekachang Bazar-oni DC office-ona dakanggipa ramarang ong·enga.
Ia ramarang a·kolrara dake namsrangjahani a·selan manderangna aro mongsongbate skulrangchi re·enggipa bi·sarangna kenchakna nangani ong·enga ine janapatengon, ia ramarangni bidingo jolo songdongenggipa manderang changni chang badi ka·doatahaoba da·alonan ia ramarangko taripile on·kujaenga ine Momin parakataha.
“Ia ramarang obosta namsrangjahani a·sel neng·nikanirangko chagrongna nangbatenggiparangde skulrangchi re·enggipa bi·sarangan ong·a maina uamang, chiblokrara dakgipa ramarangko ga·broke, skulrangchi re·na nangenga. Unbaksana ia ramarang pilakan a·kolrara dakahani gimin ian manderangna kenchakna nanganiba ong·enga,” ine Momin, Chief Minister-na sedoatgipa chittio parakataha.
Indake ong·engon, ia ramarangko ta·raken taripile on·china, rama tarina tangka paisarangko chame on·anio dongnuani dongjachina, ramarangko baikamna gita dake tarichina aro ramarangko tarina tangka paisarangko chamatengon, pangnan jolni manderang baksa agangrikchengchina gita Momin, a·dokni Chief Minister-ko didiataha.
Resubelpara constituency-ara Meghalaya Legislative Assembly-ni Deputy Speaker Timothy D Shira-ni constituency-an ong·achim ine nikna man·a.