Bi·sa saksani mikrononiko TCH-ni doctor-rang go·ol oke galna man·a

TURA: Tura Civil Hospital-o bilsi 14 ong·gipa me·a bi·sa saksani mikrono napgipa go·ol ge·sako doctor-rang operate ka·enba oke galna man·aha.
Koborko on·ani gitade, ia me·a bi·sa, re·anggipa July-ni 24 tariko a·sel ong·e, uni mikrono centimeter 6 ong·gipa go·ol ge·sa napahachim.
A·sel ong·ani ja·man ia me·a bi·sako hospital-ona ra·angon, uni jakrani mikron ripome dongaiahani gimin bakan doctor-rang ia me·a bi·sako CT Scan dakaha aro CT Scan dakon, uni jakrani mikron ning·ao go·ol ge·sa nape dongenga ine nikna man·aha.
Ia me·a bi·sani mikrono go·ol napahani a·sel ua nikna gita man·jahachim indiba ja·mano doctor-rang, uni mikrononiko ia go·olko ra·gale galna man·ani ja·man ua da·o namen nikna man·piltaiaha ine u·iataha.
Ia operation-ko Tura Civil Hospital-ni M.Ch Plastic Reconstructive aro Aesthetic Surgeon Dr Dexter R Marak dakdilaha aro una Senior Medical & Health Officer Dr Crejitson R Marak, MD Anaesthesia Dr Stevie Jaseng N Sangma aro OT Nurse sakgni, chong·motan Drimchira M Marak baksana Nancy Ch Marak dakchake on·aha.
Ia me·a bi·sani mikronko operate ka·anio chu·sokgipa ong·ahani gimin aro ia me·a bi·sani mikronko nikpiltaina dakchakahani gimin Tura Civil Hospital-ni Superintendent Dr IC Marak, Dr Dexter Marak aro uni dolko mittelpilataha.