Gambegre by-poll-na rakbate dakgrikna nanggen: Pala

SHILLONG: Batanggimin Lok Sabha election Tura Parliamentary seat-ko dakgrike bilmane amgenchimoba, Congress, re·baenggipa Gambegre by-election-ko ra·jaenga aro bilake dakgrikna nangnasusu nikenga.
MPCC President, Vincent Pala agana je, Deborah Marak aro Saleng Sangma gita dakgipa party-ni a·gipi dilgiparang election-o chena gita raken kamrangko ka·tokenga.
Unomitingo, by-election-o bilaken dakgrikna nangnasienga ine Congress chanchienga aro party ia chango rakbate kam ka·na nanggen ine uamangni koboro janapaha.
Da·o dipet by-election-ni sal tarikko parakatkujaomangba, pilak political party-rangan constituency-ni ning·o an·tangtangnade ka·sinsin campaign-rangko ka·soengaha ine nikatna man·a.
By-election-o susaani namen gisik nangatbeani ong·gen maina, NPP, Conrad Sangma-ni jikgipakon party candidate dake susaatna miksongenga.
BJP-ni Bernard Marak-ba BJP tikito susanasusu nikenga.
Unomitingo, Congress-de da·odipet darangkoba candidate-na mingkuja, jeon TMC-de uamangni candidate-ko susaatgenma susaatjawama chanchian dongkuja.