GDS online recruitment-na Assamese/Bengali-koba MIL subject dake ra·gatchina AMMSU dabia

TURA: Post Office-o Gram Dak Sevak (GDS)-ni Online Recruitment-na Khasi aro Garo-ko MIL subject dake ra·gatangani ja·man da·o Meghalaya a·doko songdongenggipa gipin jatrangni namgnina Assamese/Bengali ku·sikkoba MIL subject dake ra·gatchina All Meghalaya Minority Students Union (AMMSU) dabiangaha.
Iani bidingo Post Offices, Meghalaya Division-ni Senior Superintendent-na sedoatengon, Meghalaya a·doko Rabha, Hajong, Muslim, Maan, Koch, Bodo, Nepali, Bengali aro uandakgipa jatrang, Assamese ba Bengali-ko MIL dake ra·engani gimin ia jatrangni namgnina GDS Online recruitment-o Assamese aro Bengali-ko MIL dake ra·gatna nangenga ine AMMSU-ni president Nur Islam parakataha.
“Meghalaya a·doko songdongenggipa manderangna ge 677 post-rangko donahani gimin anga mittelpilna ska indiba ia ge 677 post-oni ge 274-ko unreserved category-na aro ge 53-kode economically weaker section (EWS)-rangna chamahani gimin chinga neng·nikanirangko chagrongna nangenga. GDS online recruitment-na Khasi ba Garo-ko MIL subject dake ra·gataha indiba Assamese aro Bengali-ko MIL dake poraigipa candidate-rangnade ian namen ra·chakna man·gijani ong·enga,” ine AMMSU-ni president parakataha.
Indake ong·engon, Meghalaya a·doko songdongenggipa Rabha, Hajong, Muslim, Maan, Koch, Bodo, Nepali, Bengali aro uandakgipa jatrang, Assamese ba Bengali-ko MIL dake ra·ahani gimin GDS online recruitment-o ia jatrangnaba cholko on·na gita Assamese aro Bengali-ko MIL dake ra·gatchina, dorgasto galna chu·onge somoiko man·na gita dorgasto ra·chakani bon·kamgipa tarikko ra·doatchina aro dingtang dingtang subject-rang baksa dorgasto galanio altubatna gita Assam-o gitan Meghalaya-oba division dakchina AMMSU, Post Offices, Meghalaya Division-ni Senior Superintendent-ko didiataha.