SHILLONG: Ia chasong gitalni somaio manderang jedake taxi salgiparang gita public transport-ko uamangni mobile phone-rangchi uamangni nokona phone ka·ate okamatna man·a, indake ong·oba Shillong-o donggiparang local taxi-rango pangchakkuenga aro songjinmao bas garirang bang·gijasan dongaia.
Shillong-o public transport system gipin songjinrango gita ong·ja namen komibea Shillong da·o local taxi-rang bang·bataan parak-pasake niamrangko pe·e system gimikkon sason ka·gopkuenga ine adita sak manderang aganaha.
Laithumkhrah, Jhalupara ba Last stop-ona local taxi-o gadona Police Bazar-o manderang sandiwilwalna nanggen.
Passenger-rangna gari seng·na-gadoa gari stand ka·na namedake biapko on·a District Administration gitalgipa arrangement-rangko dakaoni baditaba bilsirang ong·aha.
Manderang nokchi re·na hang jang dakmitingo bang·bata somairangon Police Bazar-o local taxi-rangni donggijako nikkuenga aro gari salgipako changija taxi bolsao sak dokrang dake bang·bata local taxirang manderangko gatenga.
Bang·bata local taxirangan namja aro passenger-rangko taxirango do·bok-mesrangko gita sikket-changket gatenga ine mitam passenger-rang neng·nikaniko aganaha.
Bang·a taxirang ganja seng·a ineba mitamrang aganaha.
Local taxi-rango nanga batpile mande gate asonganirango dongtoja indiba re·na nanga ingipao maming minggipin chol dongjae re·enga ine mitam me·chikrang aganaha.
Meghalaya sorkari local taxi-rangni aro sorkarini bas garirangni gimin mamingkon chanchija aroba bijolini bas garirangko ra·bana miksonganirangba sorkarini file-rango jabol ong·e dongkuenga.
HNYF-ni chek ka·ani gimin tourist-rangni re·baani komibea
U·IATTIMGIPAONI
SHILLONG: October ja ja·manrangoni a·dokona tourist-rangni bang·en sokbaanirangko nikgen, HNYF-ni a·palchini re·bagipa manderangko raken nirikkianichi Meghalaya-o tourism industry namjabegipa obosta ong·enga.
Shillong-o June July ja dingtangmancha Assam-oni hajalni hajal tourist-rang Shillong-ona re·bae a·dokni hotel-rango chakpilgija ong·aiachim.
Indiba HYNF-ni tourist-rangko raken chekking ka·ani gimin tourist-rangni re·banirango neng·nikaniko man·aha maina Meghalaya-ona re·bana jajagipa tourist-rang re·bana manchigiminko bang·arangan dontongaha.
August-September jarang namja, da·o October-onisan tourist-rang bang·bagen ine industry-oni mitam manderang aganaha. Da·o tourist-rangni re·baanirang namen komibea ineba u·iataha.
Ru·utgija salo HNYF-ni chekking ka·anina dingtang dingtang tourist association-rang ku·cholsan ong·enga aro tourist-rangni a·dokona re·baaniko jeba golmal ka·ani kosako chakatna chanchiaha.
