NGH-ni Khaldang Agitchak songo bijoli man·jaenga

TURA: North Garo Hills a·jani Khaldang Agitchak songna bijoli on·enggipa transformer antisa skangan nosto ong·ahani a·sel ia songo bijoliko man·jaengani gimin ia songna gital transformer-ko on·china songni manderang dabiangaha.
Khaldang Agitchak songo songdongenggipa manderangni parakatani gitade, ia songna bijoli on·enggipa transformer antisa skangan nosto ong·ahaoba MeECL-o kam ka·giparang, ia transformer-ko tarina aro gitalko on·skana gisiko nangjaengani a·selan uamang antigimik andalmin·dik ong·e dongna nangtokengahachim.
“Da·alona kingkingan MeECL-ni darang official-rangan chingni songona re·bae, chingni neng·nikanirangko sing·sandia dongkujaenga. Antisa batpilengahaoba ia songni transformer-ko tarie on·kujaengani a·selan bag ital transformer-ko chate on·kujaengani a·selan chinga andalmin·dik dongna nangtokenga,” ine songni manderang parakataha.
Khaldang Agitchak songo bijoli dongjaengani a·selan songni manderang, mongsongbate chatro chatrirang, neng·nikanirangko chagrongna nangtokenga ine janapatengon, ia songna ta·raken transformer gitalko on·e, bijoliko on·piltaichina gita songni manderang, MeECL official-rangko didiataha.