SHILLONG: Meghalaya a·dokni SSA skulrango non-teaching staff ong·e kam ka·enggiparangna 80 percent-chi bariatchina dabianiko nipilna gita a·dok sorkari Rationalisation Committee-ko songaha.
Ia rationalization committee-o sorkari official-rangna agreba, All Meghalaya SSA Non-Teaching Staff Association (AMSAANTSA)-ni membor sakgniba donggen.
Ia gital committee-ko songani bidingo u·iatengon, ia Rationalisation Committee-ni changgipin tom·aniko August 8 tariko ong·attaina sienga indiba ia tom·anio committee maiko ja·ku de·na sienga uko ma·sikujaengani gimin uamang jingjengataniko dakangkuaigen ine AMSSANTSA-ni president Jennifer J Synrem parakataha.
SSA skulrango non-teaching staff ong·e kam ka·enggiparang, an·tangtangni dormahako 80 percent-chi bariatchina dabitokengoba, kam ka·enggiparangna 25 percent-chi dormahako bariatna sorkari tik ka·ahani gimin AMSSAANTSA-ni membor-rang, re·anggipa Budbar salonin ari gri, Shillong songjinmani Madan Malki kal·chakramo jingjengatengachim.
“Chingni dabiani gita 80 percent-chi chingni dormaharangko bariatna ku·rachakaniko on·kujaskal chinga ia biaponi re·jitjawa aro chingni jingjengataniko dontongjawa,” ineba AMSSAANTSA-ni president parakataha.
