TURA: Agia-Medhipara-Phulbari-Tura (AMPT) rama gita dal·dalgipa truck garirang, mongsongbate Bhutan-oni Bangladesh-ona ro·ong salruraenggipa garirang salanti re·ruraengani a·sel Rajabala-oni Nidhanpur-ona dakanggipa ramarang namsrangjaengahani gimin A·chik Conscious Holistically Integrated Krima (ACHIK) North-West Zone (NWZ) suk ong·gijaniko parakatenba, ia rama gita bostu salenggipa garirangna rakgipa niamrangko ra·gatchina aro ia ramarangko ta·raken taripile on·china sorkariko didiataha.
ACHIK-NWZ-ni co-chairman Francewell Marak-ni parakatani gitade, ia AMPT rama gita Bhutan a·songoniko ro·ong salenggipa truck garirang, dongimin niam metric ton 9-na bate salengani a·sel ia ramarang nosto ka·ako man·enga aro ia ramarang da·o namsrangjaengahani a·sel nangana re·ruraenggipa manderang, mongsongbate skulrangchi re·enggipa chatro chatrirang neng·nikanirangko chagrongna nangtokengachim.
“Ro·ong salgipa truck garirang, dongimin niamna bate jredugae salengani a·selan ia rama nosto ka·ako man·enga aro da·o ia ramarango a·kolrara dakakosa nikna man·engaha. Ia rama a·kolrara dake nosto ong·ahani gimin re·ruraenggipa manderangna, mongsongbate chatro chatrirangna kenchakna nangani ong·enga,” ine Marak parakataha.
Jolo songdongenggipa manderangni namgnina aro ia ramako re·ruraenggipa manderangni namgnina ia rama gita bostu salruraenggipa garirangna rakgipa niamrangko ra·gatchina sorkariko didiatengon, ia ramako ta·raken taripile on·china gitaba ACHIK-NWZ, sorkario dabiangaha.
