TURA: Bangladesh a·songo so·sojengjeng ong·enganichi, West Garo Hills aro Bangladesh a·songni simarango ong·gija dakgipa manderangni re·ruraani aro ma·manti bosturangko badingsrukanirangna kenchakna nangani ong·engani gimin Bangladesh a·song baksa nangchapgipa West Garo Hills a·jani pilak simarangon, zero line-oni a·songni ning·ao metre 200-ona kingking ‘Night Curfew’ ba walni curfew-ko ra·gataha ine West Garo Hills a·jani Deputy Commissioner Jagdish Chelani u·iataha.
Ia pilak simarangon walni curfew-ko ra·gatahani gimin attam 6:00 bajioni pring 6:00 bajiona, ia simarango manderangni re·ruraanirangko champengataha ineba WGH a·jani Deputy Commissioner u·iataha.
Ia simarango night curfew-ko ra·gatahani gimin walni somoio mande sakbonga ba una bate jinma tom·ani, jinma re·jomani, gol·dik, iron rod, ro·ong ba uandakgipa silchidare ra·bitaniko champengataha ine Deputy Commissioner parakataha.
Deputy Commissioner-ni u·iatani gitade, Bangladesh a·songo so·sojengjeng ong·engani gimin ong·gija dakgipa manderang, sima jolrango ong·gija kamrangko aro ma·manti bosturangko niam gri badingsrukna jotton ka·ani cholrang dongnaba gnang ine niksamsoenba, ia sima jolrango walni somoio manderangni re·ruraaniko champengna ‘Night Curfew’-ko ra·gatangaha.
Iana skang, Meghalaya sorkariba Sombar salonin Bangladesh a·song baksa nangchapgipa pilak simarangon walni curfew-ko ra·gatangenba, attam 6:00 bajioni pring 6:00 bajiona ia sima jolrango manderangni re·ruraanirangko champengatahachim.
