Shillong: Da·omitingo Bangladesh a·songo ong·enggipa obostarangni bidingo Chief Minister, Conrad K. Sangma tom·aniko ong·ate chanchidilanggen.
“Chinga Chief Minister-ni re·baaniko sengenga, Bangladesh-o ong·enggipa obostarangara, baditana econmy aro bading-chiwalgrikaniko dakani nangchakegen, uarang pilakni gimin chanchianiko dakanggen,” Tourism Minister, Paul Lyngdoh aganaha.
CM-ni tom·atani somoio, Meghalaya Sector-o ga·akgipa international sima ari jolgimiko chel·chake rakkiani giminba chanchianggen.
Lyngdoh, jean Art aro Culture department-niba in-charge ong·enga, ua indake aganaha je a·dok sorkari, Bangladesh-o Khasi matgrik U Tirot Sing Syiem-ni mangkrongko dal·bate songna gitaba chanchienga.
Da·omitingo a·songo so·sojengjeng ong·engmiting somoio, Bangladesh-ni skotong songjinmao donggipa Indira Gandhi Cultural Centre-ko wa·al so·e nisiaha aro cultural centre-ni cholgugao U Tirot Sing-ni mangkrongko songgipakoba mnisalo nosto ka·e galahachim.
Agency report-rango parakani gitade, ding·chaoe dongenggipa mande jinma, Bangladesh-ni skotong songjinmani Dhanmondi jolo donggipa Indira Gandhi Cultural Centre (IGCC) aro Bangabandhu Memorial Museum-ko Sombar salo chadrape nosto ka·aha.
Ia museum-ara, Hasina-ni pagipa Sheikh Mujibur Rahman-ni bimingo ku·pakgimin ong·achim, jekon skang 1975 bilsio president ong·e dangdike on·mitingo so·otahachim.
Re·anggipa February jao, Bangladesh-o Azadi Ka Amrit Mohotsav-ko maniani bak gita dake U Tirot Sing Memorial-ko Bangladesh-ni Dhakao donggipa Indira Gandhi Cultural Centre (IGCC)-o songahachim.
U Tirot Sing Syiem, jean saksa Khasi Matgrik ong·achim.
