TURA: Kherapara-oni Josipara-ona tarina on·gipa PMGSY ramako chu·gimik matchotaha ine report-ko on·ahaoba ia ramako Kherapara-o nikna man·kujaenga ine Tura-ni MDC aro BJP-ni state vice president Bernard N Marak parakataha.
Marak-ni parakatani gitade, ia ramako tarina 2018-29 bilsirangon sanction ka·ahachim aro report-oba ia ramako chu·gimik matchotaha ine mesokahachim indiba ia PMGSY ramako Kherapara samba jolrango donggipa pilak songrangoniko sandion nikna man·kujaengachim.
“Ia ramani bidingo anga sing·sandiaton, Kherapara-oni Diganggre songo tarianggipa PMGSY ramani sign board-kosa officer saksa angna photo ka·e on·ataha indiba Kherapara-oni Josipara-ona dakanggipa ramade ong·jachim. Kherapara-oni Josipara-ona km 5 ong·gipa rama apsanan Rimrangpara-oni Josipara-ona km 12 ramaba ong·a ine sakgipin officer angna u·iatskaaha aro ian angko namen jajabatataha,” ine Marak parakataha.
“Rimrangpara-de Kherapara-oni km 9 chel·aosa donga aro angna u·iatani gitade, Kherapara-oni Josipara-ona dakanggipa ramade Rimrangpara-oni Josipara-ona km 12 ong·gipa ramaonisa a·bachengskagen. Kherapara songde Tura-Dalu ramaosa ong·a aro ia ramani sign board, km 21 chel·aosa dongskagnok,” ine Tura MDC parakataha.
Ia gimaenggipa PMGSY ramani chong·mot biapko mesokchina ua officer-rangko mol·molataha ine janapatengon, Gambegre block-ni ning·o donggipa Kherapara songna on·gimin ramako songni manderangna u·iatgija Dalu block-ona apjitangskaahani gimin iani bidingo name am·sandianirangko dakna nanga ine Marak parakataha.
