TURA: Bangladesh a·songo so·sojengjeng ong·enganichi ma·brangna nangenggipa Garo, Khasi, Jaintia aro uandakgipa Tribal manderangna a·doko a·tiprangko on·china Tura-ni MDC aro BJP-ni state vice president Bernard N Marak, a·dokni Chief Minister Conrad K Sangma-ko didiataha.
“Bangladesh a·songo ma·brange India a·songo katnapenggipa Garo, Khasi aro gipin Tribal manderangna, mandeska channe, a·doko a·tiprangko songe on·china anga mol·molenga. Bangladesh a·songo so·sojengjeng ong·enganichi bang·a dosgri manderang janggirangko gimaatna nangaha aro jemangan simarang gita Bangladesh a·songoni katbaengachim, an·tangtangko rim·a man·na aro so·ota man·na kenani baksana katbaenga,” ine Marak, Chief Minister-na sedoatgipa chittio parakataha.
Bangladesh a·songoni katnapbaenggipa Garo, Khasi aro gipin Tribal manderangko name sandichengenba a·tiprango ma·chakna on·na nangenga ineba BJP MDC parakataha.
“Bangladesh a·songo Garorangko man·chape dingtang dingtang Tribalrang donga aro uamang an·chingni a·doko ma·chakna bi·enga ong·ode uamangko ma·chakna on·enba, obostarang namkalangahaon a·songtangona watpilatna nanga,” ine Marak, Chief Minister-na seatgipa chittio janapataha.
Bangladesh a·songoni katnapbaenggipa A·chikrangko Maharirangan sandienba, ma·chakna on·e ja·mano a·songtangona watpilatna man·gen ineba ua ku·pattianiko on·angaha.
“Bangladesh a·songoba pilak Maharini chatchirang donga aro iandake dukni somoirango an·ching uamangko nichanggalgija dakchakanirangko on·na man·ode nambatgen,” ine Tura MDC parakataha.
Iana skangsan, Meghalaya a·dokni Education Minister Rakkam A Sangma-ba Bangladesh a·songo ma·brangenggipa Garo, Khasi aro Jaintiarangko, adita sal somoirangna a·doko nokchakenba, obostarang namkalangahaon a·songtangona watpilatna gita ma·mong sorkari baksa agangrikna nangenga ine parakatahachim.
Bangladesh a·songo so·sojengjeng ong·anirangchi ua a·songo songdongenggipa Khasi, Garo aro Jaintiarang, sinjetanirangko man·e Meghalaya a·doko katnapna nanggenchimode, ia manderangko mandeska channe, adita somoirangna a·doko nokchakchengna nanga aro obostarang namkalangahaon a·songtangona watpilatna nanga ine Sangma aganahachim.
Bangladesh a·songo ong·enggipa obostana an·tangni suk ong·gijaniko parakatengon, Bangladesh a·songo songdongenggipa Khasi, Garo aro Jaintiarang bang·en donga aro ia manderang Bangladesh a·songo sinjetako man·e Meghalaya a·doko katnapna nanggenchimode uamangko adita salrangna nokchakna gita India sorkari baksa agangrikna nanga ine Education Minister aganahachim.
“Ia manderangara an·chingni bakdrangrangan ong·a aro a·songni simachisan an·ching ma·ekgrikatako man·giparang ong·a. Uamangba an·chingni manderangan ong·ani gimin gipin a·songo uamang dokkol ka·ako man·e Meghalaya a·doko katnapna nanggenchimode, uamangko nokchakna gita chanchirimanirangko dakna nangenga,” ine ua aganaha.