SHILLONG: MCS officer-rangni kamna ra·anio niam gita kamko ka·jaha ine matnangenba, Meghalaya Public Service Commission (MPSC)-ni Chairman aro Secretary-ko kam watchina dabie Bristibar salo, Khasi Students Union-ni membor-rang, MPSC office a·palo jingjengatanirangko dakangaha.
MCS prelims porikkao pilak candidate-rangni man·gipa mark-rangko jinmana mesokchina aro MCS officer-rangko kamo ra·anio maming dongnuani dongjachina gita KSU dabiengachim ine nikna man·a.
MCS prelims porikkao pilak candidate-rangni man·gipa mark-rangko jinmana mesokchina dabiengoba ia dabianirangko MPSC-ni official-rang knachakjaengani gimin Commission-ni Chairman aro Secretary-ko kam watchina KSU dabiskaaha.
Ia jingjengatanio KSU-ni membor-rang, MPSC-ni Chairman aro Secretary-ni bimangko tarienba, jinma so·e galaha aro ia official-rangni kosako matnange chrik a·bokanirangkoba dakangaha.
MCS prelims porikkako segipa Secretary-ni demechik baksana gipin sakbonga candidate-rangni man·gipa mark-rangko mesokna sikjaengani giminsa candidate-rangni mark-rangko MPSC jinmana mesokjaenga ineba KSU matnangaha.
Indake ong·engon, MPSC-ni kamrangna ra·anio ong·gija dakanirang dongjachina aro ku·mitdu ra·anirang dongjana gita MPSC porikkako segipa pilak candidate-rangkon apsan nangrime jegalchina gitaba KSU didiataha.
