SHILLONG: East Khasi Hills a·jani Mawsynram-o donggipa Mawjynbuin Cave ba rong·kolo Hindurangni olakkianiko champengna tik ka·angani ja·man, dolsa Hindu manderangni badi ka·aniko man·enba Bristibar salo Meghalaya High Court, Mawsynram songni Dorbar Shnong baksana East Khasi Hills a·jani Deputy Commissioner aro Superintendent of Police (SP)-ko hearing dakna okamataha.
High Court-o hearing dakaniko kobor ra·timgiparangna talate on·angengon, da·o dipet ia case-ni bidingo Meghalaya High Court maming ja·kurangko de·kuja aro re·baenggipa August-ni 14 tariko hearing-ko daktaina tik ka·angaha ine Mawsynram songni ukil Vivan Ngap Kynta parakataha.
Mawjynbuin Cave-o olakkina gita Hindurangko dorgasto galchina tik ka·ani giminba dingtang dingtang dolrang baksa tom·e chanchirimtaichina Meghalaya High Court, Mawsynram songni Dorbar Shnong-na pakwate on·ataha ineba ua aganaha.
Mawjynbuin Cave-o Hindurangko olakkina on·jana gita Mawsynram songni dilgiparang tik ka·angahani gimin iani bidingo Hindurangni Yatra dol, High Court-o badi ka·angskaaha aro uandaken Bristibar salo Meghalaya High Court, iani bidingo hearing dakna gita Mawsynram songni dilgiparangko aro East Khasi Hills a·jani DC aro SP-koba High Court-ona okamatahachim.
Mawjymbuin Cave-o Hindurangni olakkianiko champengna tik ka·ahani gimin Assam-ni Kutumba Suraksha Parishad (KSP) minggipa dol, Jorabat, Paikan aro uandake Meghalaya a·dok baksa nangchapgipa biaprango champengatskana mikrakataniko on·angskaahachim.
Iani bidingo aganchakaniko on·china Meghalaya sorkario dabiangengon, “Uamang Hindurangni kosako ja·kurangko de·engani giminsa chinga Meghalaya a·dokni ramarangko champengskana tik ka·aha. Chinga iandake ramarangko champengatbebegenchimode uamang mamingkoba dakna man·jawaha,” ine KSP-ni president Satya Ranjan Borad aganaha.
Indake ong·engon, Meghalaya a·dokni ramarangko champengatna gita KSP dolni ka·mikkenataniko on·ahani gimin a·dokni Tourism Minister Paul Lyngdoh-ba raken jegalatskaaha.
“Dolantion, toromantion aro songsalantion iandakgipa manderangde dongaia. Ia manderangara mamingkoba chanchichenggija agangiparangsan ong·aia aro uamangni kamna chinga maming aiao inmanani dongja. Manderangni rochakgipa biap ba rong·kolrangko badiaba toromni olakkianirangnade jakkalna man·jawa,” ine Lyngdoh aganaha.
Laitumkhrah gilja nokko nina gita bang·a manderangan Meghalaya a·dokona re·baenga indiba ia gilja nokona Catholic-rangsan re·angna man·aigen ine ia Mondolini dilgiparang a·kanga dongkuja ineba Lyngdoh toe janapataha.
Apsan daken Tour Guides Association of Meghalaya (TGAM)-ba Mawjymbuin Cave-ko Hindurangni olakkiram dake jakkalna miksonganiko Mawsynram songni Dorbar Shnong champengatahani gimin chakpaaniko parakataha.
Ia biapara tourist-rangni rochakgipa biapsa ong·a ine janapatengon, ia biapko Hindurang olakkiram dake jakkalgenchimode jabolrara dakakosa nikna man·gnok ine TGAM parakataha.