SHILLONG: Bangladesh a·songo so·sojengjeng ong·engani gimin a·song damgnini gisepo, mongsongbate Meghalaya a·dokni simarango bading chiwalgrikanirangko dontongatahani a·sel a·dokna noksan ong·na nangengaha.
Meghalaya a·dokni ma·manti bosturang, mongsongbate rong·chun aro ro·ongrangko Bangladesh a·songona watengachim aro salantian bol 600-mangni gita truck garirang, a·dokni dingtang dingtang simarang gita rong·chun aro ro·ongrangko Bangladesh a·songona ra·angrongengachim.
Indake ong·genchimoba da·o Bangladesh a·songo so·sojengjeng ong·engani gimin a·song damgnini sima gita re·ruraanirangko champengatchengaha aro uandaken bading chiwalanirangoba nangchakeaniko man·na nangengaha.
Ma·manti bosturangko Bangladesh a·song baksa bading chiwalgrikenggipa manderangni u·iatani gitade, Dawki aro Tamabil gita Bangladesh a·songona bostu salangenggipa truck garirang da·o ramarangon jachange dongna gita nangtokengaha.
A·song damgnini gisepo re·ruraani aro bading chiwalgrikaniko dontongatchengahani a·sel da·o dingtang dingtang quarry nokgiparang aro ia quarry-rango kam ka·e cha·enggipa manderangba neng·nikanirangko chagrongna nangskaengaha.
War Jaintia Limestone, Boulder Stone Exporters & Miners Association-ni u·iatani gitade, a·song damgnini gisepo bading chiwalgrikaniko aro simarang gita re·ruraanirangko champengatahani a·sel salprakon gong lak 20-mangni gita Meghalaya a·dok noksan ong·na nangengaha.
Meghalaya aro Bangladesh a·songni simarango dingtang dingtang border haat-rangba dongachim indiba da·o ia border haatrangkoba chipe donna nangengahani a·sel songni nokni manderangba noksan ong·na nangtokengaha. Songni nokni manderang, ia border haat-rangon an·tangtangni game ge·e man·gipa bosturang aro jaktangchi tarigipa ma·manti bosturangkoba pale sim·e cha·pana man·engachim ine nikna man·a.
