Nongpoh: Ri-Bhoi district-o mingsa cha·boke cha·ani a·selko mejalo rim·a man·aha, jeon company ge·sa gas cylinder-rangko Nongpoh jolo palrarone on·engachim, indake uamangni ra·rone on·enggipa gas cylinder-rango rongjriatna gita chirangko chipenba bree jakkalenggipa manderangko togie cha·enga.
Cha·boke cha·enggipa dolsa company, jean Ri Bhoi Gas Agency-ni gita Nongpoh jolo donggipa manderangna 15.2 kilogram mang jrimgipa cylinder-rangko ra·rone palengachim, uamangni togie palenganiko Sohlait Thymmai songni Marian Syngkli minggipa rim·a man·ahachim. Uni aganani gitade gas cylinder-ko bon·pile jakkalomangba uni rongjrianiara 19.80 kilogram mangcha ong·kuengachim.
Ia obostarangni bidingo koborna parakengon, Syngkli uni jagokpilani kattarangko aganaha, gas cylinder-ko ua June 11, 2024 tarikoni so·chakataha aro June 24 tarikon bon·aiaha ine aganaha.
Ua indakeba aganaha je, uamangni jakkalrongani gitade, gylinder rongsa uamangna jasade choliranga, maina uamang indakpile gas-ko jakkalna nangjachim. Gas bon·ani ja·mano rekreke nion cylinder ning·o komibeoba adhagrik mang ong·nasipile chi dongna nanga ine uamang ma·sina gita man·aha.
Ia a·selrangni bidingo Marian Syngkli, Nongpoh Police Station-o FIR on·aha, aro manderangko togie cha·enggipa dolni kosako niamo pangchake bichal ka·china gitaba ua didianiko on·aha.
