SHILLONG: Congress-ni sakgittam MLA-rang – Gabriel Wahlang, Charles Marngar, aro Celestine Lyngdoh – uamang National People’s Party (NPP)-o napna tik ka·toka-ha. Uamangni ja·ku de·a-niara party-na jean Saleng A Sangma-ni Tura parliamentary seat-ko cheanina kusi ong·enga, uo nangchakegen.
Sakgittam MLA-rang baksa agangrikna jotton ka·on man·jaha, Nongstoin-ni MLA Gabriel Wahlang aro Mawhati-ni MLA Charles Marngar- uamangona sokangna man·jaha aro Umsning-ni MLA Celestine Lyngdoh, gipin bidingo jakchakgija ong·enga. Uni gimin Meghalaya Pradesh Congress Comittee-ni president Vincent H Pala baksa agangrikna jotton ka·on, biaba United States-osa ine aganaha.
Mylliem-ni MLA aro Leader of the Opposition, Ronnie V Lyngdoh-na phone call ka·ataon, ua phone ra·chakjaha. Gipin Congress dilgiparangba iani gimin mamingkon agana dongja.
Minggipin Pala, United States-ona re·angna skang, iani gimin kobor man·anga ine kobor jangenga, ian Meghalaya-o Congress aro NPP-ni bakrimnaba donga ine jajrengtokenga.
Party-ni mitam manderangni aganani gita, sakgittam MLA-rang, NPP-o napna skang uamangni dilgipa aro supporter-rang baksa agangrikaha. Marngar, gitcham chief minister aro NPP-ni gitcham dilgipa DD Lapang-ni noko tom·e chanchirimao Congress-oni ong·katna tik ka·aha. Iamang sakgittam MLA-rang Gambegre Assembly constituency-o ong·atnansienggipa by-election-na skang apsan NPP-o napna tik ka·aha.
State Congress, bilsi 2023 Assembly election-o ge·bonga seat-rangko man·aha. Indiba Saleng Sangma-ni Tura parliamentary seat-ko cheani ja·man Gambegre seat-ko watna nangahani gimin Congress baksa ge·bri seat-san dongrikaijok.
